Mysamachar.in- સુરત:
તમે કોઈ મહત્ત્વપૂર્ણ બિઝનેસ કરો છો અને તગડો નફો તથા તોતિંગ ટર્નઓવર ધરાવો છો તો, તમારો બિઝનેસ ડેટા તમારાં હરીફ અથવા તમારાં ધંધાકીય કે અન્ય કોઈ પ્રકારના દુશ્મન માટે ખૂબ જ મહત્વપૂર્ણ સાબિત થઈ શકે છે અને તમારા આ બિઝનેસડેટાના દુરુપયોગથી તમને સામેની વ્યક્તિ ખૂબ મોટું નુકસાન પહોંચાડી શકે છે. ગુજરાતમાંથી આ મતલબની સત્તાવાર રજૂઆત છેક દિલ્હી પહોંચી. આ અગાઉ આવી રજૂઆત ગાંધીનગર પણ થયેલી પરંતુ આ મામલો કેન્દ્ર સરકાર હસ્તક જ ઉકેલી શકાય એ પ્રકારનો છે. મામલો અતિ ગંભીર છે.
સુરતના ચાર્ટર્ડ એકાઉન્ટન્ટ એસોસિએશનએ આ મતલબનો પત્ર કેન્દ્ર સરકારના નાણાંમંત્રીને મોકલ્યો છે. આ પત્રમાં ગંભીર અને ચિંતાપ્રેરક હકીકતો લખવામાં આવી છે. પત્રમાં લખાયું છે કે, GSTની ઓનલાઈન વ્યવસ્થાઓમાંથી કરદાતાઓનો ગુપ્ત ડેટા ઉભી બજારે વેચાણ થઈ રહ્યો છે. આ માટે એક ગેંગ કાર્યરત છે. આ પત્રમાં આ ઉપરાંત રિફંડમાં વિલંબ અને તેને કારણે GST તંત્રમાં ચાલતો અને પોષાતો ભ્રષ્ટાચાર અને અધિકારીઓ દ્વારા ધંધાર્થીઓને ઝીંકવામાં આવતાં આડેધડ દંડ અંગે પણ ફરિયાદ કરવામાં આવી છે.
નાણાંમંત્રીને લખાયેલા આ પત્રમાં CA એસોસિએશન કહે છે: ડેટા સોલ્યુશન નામની એક ગેંગ ગુપ્ત ડેટાના વેચાણનો આ કાળો કારોબાર ચલાવે છે. આ કાળો ધંધો મોટાં પ્રમાણમાં ચાલી રહ્યો છે. GST સંબંધિત તમામ પ્રકારના ગુપ્ત ડેટા ઉભી બજારે વેચાણ થઈ રહ્યા છે. આ ગેંગ દિલ્હી, ગાઝિયાબાદ અને નોઈડાથી આ કાળો ધંધો ઓપરેટ કરે છે. આ અંગેના પુરાવાઓ અમારી પાસે ઉપલબ્ધ છે તેમ આ CA એસોસિએશન કહે છે.
એસોસિએશન કહે છે: કોઈપણ બિઝનેસની આ ગુપ્ત વિગતો ત્રીજા પક્ષ પાસે પહોંચી જવાથી, સંબંધિત બિઝનેસમેનને સ્પર્ધા અને નુકસાન સહન કરવા પડે છે. બિઝનેસની ગુપ્ત માહિતીઓ લીક થવી એ ગોપનીયતાનો ભંગ પણ છે. પરિસ્થિતિઓ એ તરફ જઈ રહી છે જ્યાં વેપાર કરવો સુરક્ષિત નહીં રહે. અગાઉ આ બાબતે ગુજરાત સરકારમાં જાણકારીઓ આપવામાં આવી હતી પરંતુ કેન્દ્ર સરકારના હસ્તક્ષેપ વિના આ મામલો ઉકેલી શકાય તેમ નથી.
એસોસિએશને પત્રમાં એમ પણ લખ્યું છે કે, આ પ્રકારની સમસ્યાઓનો ઉકેલ લાવવામાં નહીં આવે તો ગુડ એન્ડ સિમ્પલ ટેક્સ તરીકે ઓળખાતી GST સિસ્ટમ જ નિષ્ફળ સાબિત થઈ શકે છે. આથી અમો સરકાર પાસેથી માત્ર ખાતરી નથી ઈચ્છતા, નક્કર પગલાંઓની આશા રાખીએ છીએ. વેપારીઓ સામનો કરી રહ્યા છે તે પ્રકારની આ સ્થિતિઓનો તાકીદે ઉકેલ લાવવામાં નહીં આવે તો, સમગ્ર વ્યવસ્થાની વિશ્વસનીયતા દાવ પર લાગી જશે એમ આ પત્રના અંતમાં કહેવાયું છે.
