Mysamachar.in:સુરત
ક્યારે કોણ કેવું પગલું ભરી લે…અમુક ઘટનાઓ એટલી વિચલિત કરતી હોય છે કે રૂંવાળા ઉભા થઇ જાય….સુરતમાં પણ આવી જ એક કંપારી છોડાવી દે તેવી ઘટના સામે આવી છે, સુરતના વરાછા બોમ્બે માર્કેટ પાસેની ઇશ્વરકૃપા સોસાયટી નજીક પગપાળા જઇ રહેલા યુવકે સામેથી આવતી સ્કૂલબસ નીચે ઝંપલાવી આપઘાત કર્યાના કિસ્સાથી ચકચાર મચી જવા પામી છે, ઘટનાના સીસીટીવી ફુટેજની તપાસ કરતા યુવકે બસ આગળ પોતે પડતું મુકી આપઘાત કર્યો હોવાનું સામે આવ્યું હતું. સ્કૂલબસ નીચે કચડાયેલા આ યુવકને રસ્તા પર કણસતી અવસ્થામાં જોઈ અરેરાટી વ્યાપી ગઈ હતી. આ ઘટનાનો વીડિયો વાઇરલ થયો છે. હાલ પોલીસે અજાણ્યા યુવકની ઓળખના પ્રયાસો હાથ ધર્યા છે.
યુવકે અચાનક સામેથી આવી રહેલી સ્કૂલબસની નીચે પડતું મૂકી દીધું હતું. બસચાલક કાંઈ સમજે તે પહેલાં આખી બસ તેના પરથી ફરી વળી હતી. બનાવને પગલે લોકોનું ટોળું એકત્ર થઈ ગયું હતું અને બસના વ્હીલ નીચે કચડાતા ગંભીર ઇજા પામેલા યુવકને લોકોએ 108ને જાણ કરી સારવાર માટે સ્મીમેર હોસ્પિટલમાં રવાના કર્યો હતો. જ્યાં ફરજ પરના તબીબે તેને મૃત જાહેર કર્યો હતો. આ મામલે પોલીસે જણાવ્યું હતું કે, મૃતક યુવકની ઓળખ થઈ નથી. અને તેની ઓળખ થઈ શકે તેવી કોઈ વસ્તુ મળી ન આવી હતી. પોલીસે હાલ યુવકની ઓળખ કરવા સાથે પરિવારજનોની શોધખોળ હાથ ધરી છે.અજાણ્યા યુવકે આ રીતે સ્કૂલબસ નીચે પડતું મૂકી આપઘાત કરી લીધો હોવાની ઘટનાના સીસીટીવી ફૂટેજ સોશિયલ મીડિયામાં વાઈરલ થતા ચકચાર મચી ગઈ હતી.
