Mysamachar.in-સુરત:
આજે સુરતના ગોડાદરા વિસ્તારમાંથી પસાર થતી બ્લૂ કલરની સિટી બસ નંબર GJ-05-BX-3225મા એકાએક આગ ભભૂકી ઉઠતા થોડીવાર માટે અહી અફરાતફરી મચી જવા પામી હતી. બસ ગોડાદરાથી ચોકબજાર જઈ રહી હતી. એ દરમિયાન શોર્ટસર્કિટ થતાં બસમાં આગ લાગી હતી. બસમાં આગ લાગતાં જ મુસાફરોને ઉતારી દેવામાં આવ્યા હતા. જોકે પળભરમાં જ આગે વિકરાળ સ્વરૂપ ધારણ કરી લીધું હતું.આગની આ ઘટનામાં બસ સંપૂર્ણપણે બળીને ખાક થઇ ગઈ હતી. તો બીજી તરફ આ બનાવની જાણ ફાયર વિભાગને કરવામાં આવી હતી. ફાયર વિભાગનો કાફલો ઘટનાસ્થળે દોડી આવ્યો હતો. ફાયર વિભાગે આગ પર પાણીનો મારો ચલાવી કાબૂ મેળવી લીધો હતો, પરંતુ ત્યાં સુધીમાં બસ બળીને ખાક થઇ ગઈ હતી. જો કે સદનસીબે આ ઘટનામાં કોઈ જાનહાનિ થવા પામી ના હતી.
