Mysamachar.in-ગાંધીનગર:
સરકારી યોજનામાં ગેરરીતિ આચરતી હોસ્પિટલો સામે રાજ્ય સ્તરે કડક કાર્યવાહી હાથ ધરવામાં આવી છે. આકસ્મિક નિરીક્ષણ દરમ્યાન યોજનાની માર્ગદર્શિકાનું પાલન ન થતું હોવાનું જણાતાં 4 ખાનગી હોસ્પિટલમાંથી 2 હોસ્પિટલને સસ્પેન્ડ કરવામાં આવી છે, જ્યારે અન્ય 2 હોસ્પિટલને કારણદર્શક નોટિસ પાઠવામાં આવી છે. જે હોસ્પિટલો સામે કાર્યવાહી કરવામાં આવી તેમાં હોસ્પિટલવાઈઝ કાર્યવાહીનો વિગતવાર અહેવાલ જોઈએ તો
-દીપ ચિલ્ડ્રન હોસ્પિટલ અને નીઓનેટલ કેર, ગોધરા, પંચમહાલને સસ્પેન્ડ કરવામાં આવી છે આ હોસ્પીટલમાં PICU અને NICU માટે જરૂરી માપદંડોની પૂર્તતા નહોતી, એક્સપાયર્ડ દવાઓ મળી આવવા ઉપરાંત MBBS ડોકટર હાજર નહોતા અને હોસ્પિટલમાં લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું અને વધુમાં ઇન્ફેક્શન કંટ્રોલ માર્ગદર્શિકાનું પાલન ના થતું હોવાનું સામે આવ્યું છે.
-કાશીમા હોસ્પિટલ, ભરુચને પણ સસ્પેન્ડ કરાઈ છે, આ હોસ્પીટલમાં PICU અને NICU માટેની માપદંડ પૂરા નહોતા ઇન્ફેક્શન કંટ્રોલ માર્ગદર્શિકાનું પાલન નહોતું થતું અને લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું, નર્સિંગ સ્ટાફ કવોલીફાઈડ ન હોવા ઉપરાંત બપોરના 12 વાગ્યા સુધી તબીબી અધિકારી હાજર નહોતા BU પરમીશન અને ફાયર NOC ઉપલબ્ધ ના હોવાનું પણ સામે આવ્યું છે
-મા ચિલ્ડ્રન અને જનરલ હોસ્પિટલ, કાલોલ, પંચમહાલને કારણદર્શક નોટિસ આપવામાં આવી છે આ હોસ્પીટલમાં પણ લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું
-મા ચિલ્ડ્રન અને નીઓનેટલ કેર, દેવગઢ બારિયા, દાહોદને કારણદર્શક નોટિસ આપવામાં આવી છે કારણ કે આ હોસ્પીટલમાં NICU માં એક્સપાયર્ડ દવાઓ મળી આવવા ઉપરાંત હોસ્પિટલ દ્વારા CCTV ફૂટેજ આપવા ઈનકાર કર્યો હતો અને વધુમાં લાભાર્થીઓને યોજનાકીય માહિતી આપતું કિઓસ્ક સ્થાપિત કરવામાં નહોતું આવ્યું
આ બાબતે આરોગ્ય મંત્રી પ્રફુલ પાનશેરીયાએ મોડી રાત્રે નિવેદન આપતા જણાવ્યું કે “રાજ્ય સરકાર આરોગ્ય સેવાઓને વધુ સુચારૂ, પારદર્શક અને લોકહિતકારી બનાવવા સતત પ્રયત્નશીલ છે. આરોગ્ય ક્ષેત્રે માનવતાને પ્રથમ સ્થાન આપવાનો સંકલ્પ છેપી.એમ.જે.એ.વાય.-મા યોજના એ ગરીબ અને જરૂરિયાતમંદ નાગરિકો માટે આશીર્વાદ સમાન છે, તેથી કોઈપણ પ્રકારની ગેરરીતિ કે માનવતા વિરોધી બેદરકારી સહન કરવામાં નહીં આવે.વધુમાં આરોગ્ય મંત્રીએ જણાવ્યું કે – “ભવિષ્યમાં પણ સરકારી યોજનામાં માનવ સેવા વિરુદ્ધ વર્તન કરનાર હોસ્પિટલ સામે રાજ્ય સરકાર કડકથી કડક પગલાં લેતી રહેશે.”
