Mysamachar.in:ગુજરાત
ગુજરાતમાં સૂક્ષ્મ, લઘુ અને મઘ્યમ ઉધોગોની સંખ્યા ખૂબ જ મોટી છે. રાજ્યમાં MSME ક્ષેત્ર લાખો લોકોને રોજગારી પૂરી પાડવા સાથે રાજ્યનાં અર્થતંત્રમાં પણ સિંહફાળો આપી રહ્યું છે. ઉદ્યોગોની સંખ્યાની દૃષ્ટિએ દેશભરમાં ચોથો ક્રમ ધરાવતું આ ક્ષેત્ર કેટલીક મુશ્કેલીઓનો સામનો કરી રહ્યું છે. ગુજરાતનાં ઉદ્યોગકારો ઈચ્છે છે કે, સરકારે ઉદ્યોગોનાં વધુ વિકાસ માટે વધુ સારૂં ઈન્ફ્રાસ્ટ્રક્ચર આપવું જોઈએ. આ દિશામાં હજુ કેટલુંક ખૂટે છે. આ ઉપરાંત સરકારે રાજ્યનાં જુદાંજુદાં વિસ્તારોમાં આવેલા વિવિધ ઉદ્યોગોને ધ્યાનમાં રાખી, ઉદ્યોગોને પ્રોત્સાહન આપવા ક્લસ્ટર બેઈઝ નીતિને વધુ અસરકારક બનાવવા પર ભાર મૂકવો જોઈએ.
ગુજરાતમાં સૂક્ષ્મ, લઘુ અને મઘ્યમ વર્ગના ઉદ્યોગોની સંખ્યાની દ્રષ્ટિએ જોઈએ તો મહારાષ્ટ્ર, ઉતરપ્રદેશ અને તામિલનાડુ પછી આપણું રાજય દેશમાં ચોથા ક્રમે છે. ઉદ્યોગકારો કહે છે : ઉદ્યોગો માટેની કોમન ફેસેલિટી વધારવી જરૂરી છે. કારણ કે, આ ક્ષેત્રમાં સ્પર્ધાત્મકતા બહુ જ છે. અને, બજારમાં ટકી રહેવા ઉત્પાદન ખર્ચ અંકુશમાં રહે તે આવશ્યક છે. ઉદ્યોગકારો કહે છે : આ ક્ષેત્રમાં રાજ્યનાં સાહસિકો વર્લ્ડ ક્લાસ ટેકનોલોજી અપનાવી રહ્યા છે. વૈશ્વિક સ્તરે સ્પર્ધાનો જુસ્સાભેર સામનો કરે છે. પરંતુ આ સ્પર્ધામાં ટકી રહેવા વધુ સારૂં કોમન ઈન્ફ્રાસ્ટ્રક્ચર આવશ્યક છે. માત્ર કોમન ઈનફ્લુએન્ટ પ્લાન્ટ કે કોમન ગટર સુવિધાઓ જ પૂરતી નથી. ગ્રીન એનર્જી તથા પ્રદૂષણ નિયંત્રણ ક્ષેત્રમાં પણ કોમન સુવિધાઓ ઉપલબ્ધ થાય એ ઇચ્છનીય છે.
જીઆઈડીસી ક્લસ્ટર આપણાં રાજ્યમાં મહત્વનાં પૂરવાર થયાં છે. જેને હવે વર્લ્ડ ક્લાસ બનાવવા જરૂરી છે. વીજખર્ચ નીચો લઈ જવા ઉદ્યોગોને વધુને વધુ રિન્યુએબલ એનર્જી પ્રાપ્ત થાય તે જરૂરી છે. વિદેશી કંપનીઓ ગુજરાતમાં રોકાણ કરી રહી છે પરંતુ આ કંપનીઓ સારૂં કોમન ઈન્ફ્રાસ્ટ્રક્ચર ઈચ્છે છે. હાલમાં અમદાવાદ અને સુરતમાં ટેક્ષ્ટાઈલ, મોરબીમાં સિરામિક, રાજકોટમાં એન્જિનિયરિંગ અને જામનગરમાં બ્રાસઉદ્યોગનાં ક્લસ્ટર છે તે રીતે આગામી સમયમાં નવા ઉદ્યોગો માટે નવા પ્રકારના ક્લસ્ટર ડેવલોપ કરવા જરૂરી છે.
વિવિધ ક્લસ્ટરમાં મિની સોલાર પાર્ક અને CEPT પ્લાન્ટ ઝડપથી કાર્યરત કરવામાં આવે તો દરેક ક્લસ્ટરમાં રહેલાં ઉદ્યોગોનાં પડતર ખર્ચમાં ઘટાડો કરી શકાય, સ્પર્ધામાં ટકી રહેવું ઉદ્યોગો માટે સાનુકૂળ બની શકે. આ ઉપરાંત ઉદ્યોગોની સ્થાપના કરવામાં ઓછામાં ઓછાં અવરોધ આવે તથા નાણાકીય ઉપલબ્ધતા વધારવામાં આવે તો તે બાબતો પણ સાહસોને વેગ આપી શકે. વિકસિત દેશોમાં સામાન્ય રીતે દેશનાં GDP માં MSME ક્ષેત્રનો ફાળો 60-65 ટકા જેટલો હોય છે અને તેને કારણે જેતે રાષ્ટ્રમાં ઉદ્યોગોનો ધમધમાટ જોવા મળતો હોય છે. આપણે ત્યાં ભારતમાં દેશનાં જીડીપીમાં આ ઉદ્યોગ ક્ષેત્રનો ફાળો માંડમાંડ 27-28 ટકા સુધી પહોંચે છે. આ ઉદ્યોગ ક્ષેત્ર દેશભરમાં હજુ વધુ કરોડો લોકોને રોજગારી આપી શકે એમ છે પરંતુ એ માટે ઉદ્યોગો માટે સાનુકૂળતા સર્જાય તે જરૂરી હોય છે.