Mysamachar.in-જામનગર:
હાલાર સહિત સમગ્ર રાજ્યમાં પાલિકાઓ અને મહાપાલિકાઓ સામાન્ય રીતે વીજળી અને પાણી જેમની પાસેથી ખરીદે છે, એ સરકારી વિભાગોને વીજળી કે પાણીના નાણાં યોગ્ય રીતે ભરપાઇ કરતી નથી અને મફતમાં તાગડધિન્ના કરવા ટેવાયેલી છે. અચરજની વાત એ પણ છે કે, શાસકો કે અધિકારીઓ પણ આ તોતિંગ દેણાં અંગે કોઈ જ ચિંતાઓ કરતાં નથી. હાલમાં વીજતંત્રએ પાલિકાઓ પાસેના આ બાકી લેણાં (એરિયર્સ)ની એક યાદી તૈયાર કરી. જામનગર વીજસર્કલ અંતર્ગત હાલારની બધી જ 10 પાલિકાઓ આવી જાય છે. જેમાં જામનગર જિલ્લાની 4 અને દ્વારકા જિલ્લાની 6 પાલિકાનો સમાવેશ થાય છે.
જામનગર વીજતંત્રએ આ 10 પાલિકાઓ પાસેથી સ્ટ્રીટ લાઈટ અને પાણી માટેના વીજજોડાણ પેટે, 31-12-2025ની સ્થિતિએ કુલ રૂ. 5 કરોડ 15 લાખ 32,000 લેવાના થાય છે. જેમાં સૌથી વધુ દેણદાર પાલિકા ખંભાળીયા છે, આ પાલિકાએ વીજતંત્રને રૂ. 1 કરોડ 69 લાખ 7,000 દેવાના થાય છે. જેમાં સ્ટ્રીટલાઈટના રૂ. 3.63 લાખ છે અને પાણી માટેના વીજજોડાણના રૂ. 165.44 લાખ છે. ધ્રોલ પાલિકા પર વીજતંત્રનું દેણું માત્ર રૂ. 4,000 છે. જે સૌથી ઓછું છે. આ નાણાં સ્ટ્રીટ લાઈટ સંબંધિત છે.
આ ઉપરાંત, વીજતંત્રની આ યાદી અનુસાર સિક્કા પાલિકા પર વીજતંત્રનું રૂ. 91.43 લાખનું દેણું, ભાણવડ પર રૂ. 87.47 લાખ, ઓખા રૂ. 67.72 લાખ, સલાયા પર રૂ. 61.83 લાખનું દેણું, જામરાવલ પાલિકા પર રૂ. 28.17 લાખ, કાલાવડ પર રૂ. 4.28 લાખ, જામજોધપુર પર રૂ. 3.74 લાખ અને દ્વારકા પાલિકા પર વીજતંત્રનું દેણું રૂ. 1.57 લાખ છે.
