Mysamachar.in-અમદાવાદ:
ગુનાહિત માનસ ધરાવતા જે લોકોને છેતરપિંડીઓ કરવાની ટેવ પડી જતી હોય છે એ લોકો ગમે તેને છેતરી લેતાં હોય છે, અદાલતોને પણ છેતરે. એવું નથી કે, કોઈ ખાનગી વ્યક્તિઓ જ આવું કરે, લાલચ એવી વસ્તુ છે કે, સરકારી અધિકારીઓ અને કર્મચારીઓ પણ આવા કુંડાળાઓમાં સામેલ થઈ જાય. આવો વધુ એક મામલો જાહેર થઈ ગયો અને રાજ્યની વડી અદાલતે આ મામલામાં આવા લાલચુ સરકારી ‘નોકરો’ને કડક ચેતવણી આપવી પડી.
મામલો અમદાવાદનો છે. એક અંતરિયાળ વિસ્તારમાં એક ધોરીમાર્ગ પસાર થાય છે, અહીં હાઈવે ટચ 1,200 વાર જમીન છે, જેનો માલિક એક અભણ ખેડૂત છે. આ જમીનમાં ખેડૂત રાત્રે ખાટલો પાથરીને એક એકદમ નાનકડું ધાબુ ચલાવી બે પૈસા કમાણી કરતો હતો તે દરમ્યાન એક બસ ડ્રાઈવર તેની પાસે આવ્યો અને કહ્યું કે, તારી આ જમીન કોઈને વાપરવા આપ તો આ ધાબા કરતા તને મોટી કમાણી દર મહિને મળી શકે.
ત્યારબાદ એક સ્વૈચ્છિક સંસ્થાની મદદથી ‘ખેલ’ ગોઠવાયો. ખેડૂતને ભોળવી લેવામાં આવ્યો. પોલીસ અને રેવન્યુ વિભાગના અધિકારીઓએ ખેલને અંજામ આપ્યો. ખેડૂતને એમ કહેવામાં આવ્યું કે, જમીન તમારી જ રહેશે, અમે તેમાં ખેતી કરીશું અને તમને દર મહિને ભાડુ આપીશું. રેવન્યુના અધિકારીએ ખેડૂતને સાક્ષી લાવવા કહેલું. ખેડૂત સાક્ષી તરીકે પોલીસને લાવ્યો. કાગળો તૈયાર થયા. મામલો આગળ વધ્યો. ખેડૂતના નામે અમુક કાગળો પર સહીઓ થઈ અને બાદમાં ખેડૂતની જમીન અન્ય કોઈ વ્યક્તિના નામે થઈ ગઈ ! પછી ખેડૂતને ખબર પડી કે, ખેલ થઈ ગયો.
બાદમાં અરજણ ડોડીયા નામનો આ ખેડૂત આ આખા મામલાને હાઈકોર્ટમાં લઈ ગયો. કોર્ટમાં પોલીસ અને સરકારી અધિકારીને હાજર રાખવામાં આવ્યા. તેમણે કરેલું સોગંદનામું ખોટું છે તેમ ધ્યાન પર આવતા અદાલતે કહ્યું: કોર્ટ સમક્ષ ખોટું બોલીને અને ખોટું સોગંદનામું આપી તમે શું સાબિત કરવા માંગો છો ? અદાલતે વધુમાં કહ્યું: છેલ્લા ઘણાં સમયથી પોલીસ અને સરકારી અધિકારીઓ અદાલતના આદેશોને ઘોળીને પી ગયા છે. તમારે પોતાની મરજીથી કામ કરવું હોય તો, સરકારી નોકરીઓ ગુમાવવા તૈયાર રહેજો.
આ મામલામાં વડી અદાલતે સરકારને નોટિસ મોકલી, તેમાં જણાવ્યું કે, આ પોલીસ અને સરકારી અધિકારી વિરુદ્ધ ખાતાકીય તપાસ શા માટે ન કરવી ? અદાલતે એમ પણ કહ્યું કે, બંને અધિકારીઓ અભણ લોકો સાથે છેતરપિંડીઓ કરે છે, કોર્ટમાં ખોટા સોગંદનામા પણ કરે છે, હવે પછી જો કોઈ સરકારી અધિકારીઓ કે કર્મચારીઓ કોર્ટને ગેરમાર્ગે દોરશે તો તેણે સરકારી નોકરીથી હાથ ધોઈ નાંખવા પડશે. અદાલતના આ આકરા વલણથી રાજ્યમાં સન્નાટો છવાઈ ગયો છે.
