Mysamachar.in:દેવભૂમિ દ્વારકા
દેવભૂમિ દ્વારકા જિલ્લામાંથી થોડા સમય પૂર્વે ઝડપાયેલા કરોડોના ડ્રગ્સ બાદ જિલ્લા એસ.ઓ.જી. પોલીસે ખંભાળિયા નજીકના દાતા ગામેથી જામનગરના એક કટલેરીના ધંધાર્થીને 17.65 ગ્રામ એમ.ડી. ડ્રગ્સના જથ્થા સાથે દબોચી લીધો હતો.
આ પ્રકરણમાં મુંબઈ ખાતેથી સપ્લાયરને પણ ઝડપી પાડવામાં આવ્યો હતો. દેવભૂમિ દ્વારકા જિલ્લા સ્પેશિયલ ઓપરેશન ગ્રુપ દ્વારા જાહેર કરવામાં આવેલી વિગત મુજબ દેવભૂમિ દ્વારકા જિલ્લા પોલીસ અધિક્ષક નિતેશ પાંડેયની સૂચના મુજબ એસ.ઓ.જી. પોલીસ દ્વારા હાથ વધારવામાં આવેલા પેટ્રોલિયમ દરમિયાન ખંભાળિયા જામનગર માર્ગ પર ગત તારીખ 27 મે ના રોજ સી.પી.આઈ. ટી.સી.પટેલ તથા સ્ટાફ દ્વારા ચેકિંગ કાર્યવાહી દરમિયાન એ.એસ.આઈ. ઈરફાનભાઈ ખીરા અને કરણભાઈ સોંદરવાને મળેલી ચોક્કસ બાતમીના આધારે ખંભાળિયા – જામનગર હાઈવે પર આવેલા દાતા ગામ પાસે ઊભેલા એક શખ્સને અટકાવી, તેનું ચેકિંગ કરતા તેની પાસે કેટલીક નાની-નાની પડીકીઓ મળી આવી હતી. આ શખ્સની પૂછપરછમાં જામનગરના સાટીવાસ રહેતા અને કટલેરીનો ધંધો કરતા મોહસીન ઉર્ફે છોટુ સતારભાઈ સાટી નામના શખ્સ પાસે રહેલો આ પદાર્થ માદક ડ્રગ્સ એવો એમ.ડી. ડ્રગ્સ હોવાનું ખુલવા પામ્યું હતું.
આથી, પોલીસે તેની અટકાયત કરી તે આ શખ્સની આગવી ઢબે પૂછપરછ કરતા ડ્રગ્સનો આ જથ્થો તેણે મુંબઈના માહીમ વિસ્તારમાં રહેતા જુબેર મોહમ્મદ ઉંમર નામના શખ્સ પાસેથી મેળવ્યો હોવાનું કબૂલ્યું હતું. આના અનુસંધાને એસ.ઓ.જી. પોલીસ દ્વારા અત્યંત ગુપ્ત રહે કરવામાં આવેલી કામગીરી અંતર્ગત એસ.ઓ.જી. વિભાગના ઇન્ચાર્જ પી.આઈ. પી.સી.સીંગરખીયા તથા સ્ટાફે જોખમી અને અતિ સંવેદનશીલ એવા મુંબઈના માહીમ વિસ્તારમાં સ્ટાફ સાથે દોડી જઈ અને અને ફૂડ ડિલિવરીનું કામ કરતા જુબેર મોહમ્મદ ઉમર મેમણ નામના શખ્સની પણ અટકાયત કરી લીધી હતી.
આ પ્રકરણમાં પોલીસે પ્રથમ ઝડપાયેલા જામનગરના કટલેરીના ધંધાથી મોહસીન સાટીને સોમવારે અહીંની અદાલતમાં રજૂ કરી, પાંચ દિવસના રિમાન્ડ પર લીધો છે. જ્યારે મુંબઈના જુબેર મેમણને પણ ગઈકાલે અહીંની અદાલતમાં રજૂ કરી, સાત દિવસના રિમાન્ડની માંગણી કરતા નામદાર અદાલતે શુક્રવાર સુધીના ત્રણ દિવસના રિમાન્ડ મંજૂર કર્યા છે. આ પ્રકરણમાં પોલીસે રૂપિયા 1,76,500 ની કિંમતનો 17.650 ગ્રામ એમ.ડી. ડ્રગ્સનો જથ્થો કબજે લઈ અને ખંભાળિયા પોલીસ મથકમાં એનડીપીએસ એક્ટ મુજબ ગુનો નોંધ્યો છે. જેમાં આગળની તપાસ એસ.ઓ.જી. વિભાગ દ્વારા ચલાવવામાં આવી રહી છે.
ખંભાળિયાના દાતા ગામેથી ઝડપાયેલો જામનગરનો આરોપી એક એક- એક ગ્રામની નાની-નાની પડીકી બનાવીને ડ્રગ્સ અત્રે સપ્લાય કરવા આવ્યો હોવાનું અને તેની કિંમત રૂપિયા 2500-2500 તે લેતો હોવાનું પણ જાણવા મળ્યું છે. આંતરરાષ્ટ્રીય બજારમાં અતિ માદક અને નુકશાનકર્તા એવા એમ.ડી. ડ્રગ્સની કિંમત રૂપિયા એક કરોડ પ્રતિ કિલોની ગણવામાં આવે છે.
