Mysamachar.in-જામનગર:
જામનગર શહેરના શરુ સેક્સન રોડ પર કલેકટર કચેરીના પટાંગણમાં આવેલ સબ રજીસ્ટ્રાર કચેરીમાં બે ઇસમોએ કચેરીના અધિકારી સાથે બબાલ કરી અને ધાકધમકી આપતા મામલો પોલીસ મથક સુધી પહોચ્યો છે અને સબ રજીસ્ટ્રાર કચેરીના અધિકારીએ આ અંગે બે ઈસમો સામે વિધિવત પોલીસ ફરિયાદ નોંધાવી છે તેની જાહેર થયેલ વિગતો એવી છે કે….
જામનગર શરુ સેક્શન રોડ પર આવેલી સબ રજિસ્ટ્રારની કચેરીમાં સબ રજિસ્ટ્રાર તરીકે ફરજ બજાવતા હર્ષ દિલીપભાઈ પરમાર નામના અધિકારીએ જામનગરના સીટી બી ડિવિઝન પોલીસ મથકમાંમાં પોતાની ફરજમાં રૂકાવટ કરવા અંગે અને ઓફિસમાં ઘુસી આવી હંગામો મચાવી અધિકારીને ગાળો ભાંડવા અંગે જામનગરના અશોક પરમાર અને નરશી ચાવડા સામે ફરિયાદ નોંધાવી છે.
જેમની સામે ફરિયાદ નોંધાઈ છે તે બન્ને ઈસમો ગઈકાલે સરકારી કચેરીમાં ધસી આવ્યા હતા, અને હંગામો મચાવ્યા પછી અશોક પરમારએ ફરિયાદી અધિકારી સાથે ઉગ્ર બોલાચાલી કરી તમે ભાવિન ચાવડા વિરુધ્ધ ફરીયાદ કરેલ છે તેનુ પરીણામ સારુ નહી આવે અને અમે તમને તથા તમારા અધિકારીને જોઇ લેશુ તેમ ઘમકી આપેલ બાદ અશોક પરમાર સાથે રહેલ અન્ય ઇસમ નરશી ચાવડાએ પણ બોલાચાલી ઝગડો કરી અધિકારીને ભુંડી ગાળો આપી નાશી જઇ એકબીજાની મદદગારી કર્યા સબબની ફરિયાદ અધિકારીએ સીટી બી ડીવીઝન પોલીસ મથકમાં આપતા પી.એસ.આઈ.ડી.જી.રાજ વધુ તપાસ ચલાવે છે.
