Mysamachar.in-મોરબી:
રાજ્યના ધોરીમાર્ગો પર અકસ્માતોની ઘટનાઓમાં દિવસે ને દિવસે વધારો થઇ રહ્યો છે, એક દિવસ અકસ્માત વિનાનો નથી જતો, એવામાં ગતરાત્રીના મોરબી નજીક ટ્રક અને કાર વચ્ચેના ગમખ્વાર અકસ્માતમાં એકસાથે 5 યુવકનાં મોતથી અરેરાટી ફેલાઈ જવા પામી છે, સ્પીડમાં જતા કારચાલકે સામેથી આવતાં બાઈકચાલકને બચાવવા જતાં સ્ટીયરિંગ પરનો કાબૂ ગુમાવી દીધો હતો અને આગળ પાર્ક કરેલી ટ્રક ન દેખાતાં પાછળથી ધડાકાભેર અથડાઈ હતી, જે બાદ કારમાં સવાર પાંચ યુવક મોતને ભેટ્યા હતા.
માળિયા હાઈવે પર ટીંબડી ગામના પાટિયે બુધવારે ગતરાત્રીના મોરબી નજીક ભરતનગરથી કાર લઈને નીકળેલા આનંદસિંઘ શેખાવત, અશોક બિલારા, તરાચંદ બિલારા, વિજેન્દ્રસિંઘ મુનિમ, દિનેશ ઉર્ફે રાજેશકુમાર નામના યુવકોને ટીંબડી પાટિયા પાસે અકસ્માત નડ્યો હતો. કાર ટ્રક પાછળ ઘૂસી જતા કારનો કચ્ચરઘાણ નીકળ્યો ગયો હતો. પોલીસની પ્રાથમિક તપાસમાં સામે આવ્યું કે કારચાલક સહિત તમામ મૃતક યુવકો મૂળ રાજસ્થાનના વતની છે અને ટ્રાન્સપોર્ટના વ્યવસાય સાથે જોડાયેલા છે. મૃતકોમાં આનંદસિંગ પ્રભુરામ સેખાવત, તારાચંદ તેજપાલ, અશોક કાનારામ, વિજેન્દ્રસિંગ અને પવનકુમાર મિસ્ત્રીનો સમાવેશ થાય છે.
