Mysamachar.in-અમદાવાદ:
રામકથા-ભાગવત સપ્તાહ અને વિશાળ યજ્ઞો જેવા મંગલ કાર્યોના તોતિંગ આયોજનો થતાં રહેતાં હોય છે, લાખો લોકો પ્રસાદ ગ્રહણ કરતાં હોય છે, કેટરર્સ અને મંડપ તેમજ લાઈટીંગ સહિતના કોન્ટ્રાક્ટર લાખો રૂપિયા કમાતા હોય છે, સમગ્ર આયોજનોમાં કરોડો રૂપિયાનો ખર્ચ થતો હોય છે. પરંતુ આવકવેરા વિભાગની ટ્રિબ્યુનલના મતે આ ‘ધર્મ પ્રચારનો ધંધો’ નથી, આથી આ પ્રવૃત્તિઓને આવકવેરામાંથી મુક્તિ આપવામાં આવે છે.
ધરમદાસ નામના એક ટ્રસ્ટ દ્વારા આ પ્રકારનું એક વિશાળ આયોજન કરવામાં આવ્યું હતું. જેને આવકવેરા વિભાગે ‘ધંધો’ ગણી હિસાબો રજૂ કરવા જણાવ્યું. આથી આયોજક ટ્રસ્ટ આ નોટિસ વિરુદ્ધ એપેલેટ ટ્રિબ્યુનલમાં ગયું. નોટિસને કાનૂની પડકાર આપવામાં આવ્યો. ટ્રિબ્યુનલે આ ટ્રસ્ટને રાહત આપતાં ચુકાદામાં કહ્યું ‘ આ પ્રવૃત્તિઓ ધર્મ પ્રચારનો ધંધો નથી.’
ટ્રિબ્યુનલે એવું સ્પષ્ટીકરણ કર્યું કે, આ પ્રકારની પ્રવૃત્તિઓ કરતાં ટ્રસ્ટને મળતાં ભંડોળને આવકવેરામાં મુક્તિ આપવામાં આવે છે. આ પ્રકારની પ્રવૃત્તિઓ પ્રજાના કલ્યાણ માટે, નૈતિક મૂલ્યો અને માનવીય ધર્મ સમજાવવા માટેની પ્રવૃત્તિઓ હોય છે, જેથી આવકવેરા વિભાગે આ પ્રવૃત્તિઓને ‘ધર્મ પ્રચારનો ધંધો’ ગણતું જે અર્થઘટન કર્યું છે તે યોગ્ય નથી. આ ધર્મ પ્રચાર નથી.
આ પ્રકારના ટ્રસ્ટને જે દાન મળે છે તે આવકવેરાપાત્ર નથી, મુક્તિ આપવામાં આવે છે. એવો ચુકાદો આવકવેરા ટ્રિબ્યુનલ દ્વારા આપવામાં આવ્યો છે. આ ટ્રસ્ટ નવસારી ખાતે કાર્યરત છે અને દાન-ભંડોળ પ્રાપ્ત કરી, આ પ્રવૃત્તિઓ કરે છે. આ ટ્રસ્ટને આવકવેરામાંથી જે મુક્તિ આપવામાં આવી છે તે કલમ-80(G)5 હેઠળ આપવામાં આવે છે.
