Mysamachar.in: દેવભૂમિ દ્વારકા
દેશના પશ્ચિમના છેવાડાના તથા અતિ પવિત્ર અને પ્રાચીન એવા દેવભૂમિ દ્વારકા જિલ્લાના દરિયાકાંઠા વિસ્તારમાં વધી ગયેલા અનઅધિકૃત અતિક્રમણ સંદર્ભે રાજ્ય સરકાર દ્વારા લાલ આંખ કરી અને આવા ગેરકાયદેસર દબાણો ધ્વસ્ત કરવા સ્થાનિક તંત્રને આપવામાં આવેલી સૂચનાને અનુલક્ષીને ગત તારીખ 11 જાન્યુઆરીથી ઓખા મંડળમાં શરૂ થયેલું આ ઓપરેશન શનિવારે આઠમા દિવસે મહદ અંશે પૂર્ણ થયું છે. જાહેર કરવામાં આવેલી વિગત મુજબ આઠ દિવસના સમયગાળામાં નાના-મોટા કુલ 525 દબાણો દૂર કરી અને 1.28 લાખ ચોરસ મીટર સરકારી જગ્યાને ખુલ્લી કરવામાં આવી છે.
દ્વારકાના પ્રાંત અધિકારી અમોલ આવટેના વડપણ હેઠળ હાથ ધરવામાં આવેલી દબાણ હટાવ ઝુંબેશમાં શનિવારે સવારે દ્વારકાના ખારા તળાવ વિસ્તારમાં એક દરગાહ દ્વારા સરકારી જમીન પરનું દબાણ દૂર કરવામાં આવ્યું હતું. દ્વારકાના સનસેટ પોઇન્ટ વિસ્તારના વિસ્તારમાં કાર્યવાહી કરવામાં આવી હતી. ત્યાર બાદ મીઠાપુર નજીક આવેલા આરંભડા સ્થિત અન્ય એક ધર્મ સ્થળ સહિતની જગ્યાઓ પણ ખુલ્લી કરાવાઈ હતી. ગઈકાલે રવિવારે કોઈપણ દબાણો દૂર કરાયા ન હતા.
– આઠ દિવસમાં રૂ. 73.25 કરોડની જમીન ખુલ્લી કરાવાઈ –
દેવભૂમિ દ્વારકા વિસ્તારમાં તંત્ર દ્વારા કરવામાં આવેલી ડિમોલિશન અંગેની કાર્યવાહી સંદર્ભે દ્વારકાના પ્રાંત અધિકારી અમોલ આવટેએ વિગતો આપતા જણાવ્યું છે કે તા. 23 ડિસેમ્બરથી દ્વારકા વિસ્તારમાં અનધિકૃત દબાણ દૂર કરવાની કામગીરી કરવામાં આવી હતી. જે ત્રણ તબક્કામાં શનિવારે પૂર્ણ થઈ છે. આ કામગીરીમાં દ્વારકા નગરપાલિકા, ઓખા નગરપાલિકા તેમજ જિલ્લા પ્રશાસનનો 110 કર્મચારીઓનો સ્ટાફ તેમજ જિલ્લા પોલીસ વડા નિતેશ પાંડેય અને તેમની ટીમ સાથે 1000 જેટલા પોલીસ તંત્રના જવાનોએ સુરક્ષા વ્યવસ્થા જાળવી હતી. જેના પરિણામે કોઈ અનિચ્છનીય બનાવ બન્યો ન હતો અને તમામ કામગીરી શાંતિપૂર્ણ રીતે સંપન્ન થઈ છે.
આઠ દિવસના આ સમયગાળામાં વિવિધ રહેણાંક મકાનો, કોમર્શિયલ તેમજ ધાર્મિક સહિત 525 દબાણ હટાવવામાં આવ્યા છે જેના પરિણામે કુલ રૂપિયા 73.25 કરોડની બજાર કિંમત ધરાવતી કુલ 1,27,917 ચોરસ મીટર સરકારી-ગૌચરની જમીન ખુલ્લી કરાવવામાં આવી છે.
– શાંતિપૂર્ણ રીતે કાર્યવાહી સંપન્ન –
દેશની આંતરિક તથા આંતરરાષ્ટ્રીય સુરક્ષા સાથે દ્વારકા વિસ્તારમાં હાથ ધરવામાં આવેલા કોરિડોર પ્રોજેક્ટ સંદર્ભે કરાયેલા આ ઓપરેશન ડિમોલિશનમાં ક્યાંય પણ કાંકરીચાળો કે અનિચ્છનીય બનાવ બન્યો ન હતો. જે માટે દેવભૂમિ દ્વારકા જિલ્લાના પોલીસ અધિક્ષક નિતેશ પાંડેયની રૂબરૂ દેખરેખ હેઠળ બે ડીવાયએસપી અને તેમની ટીમનો બંદોબસ્ત પણ ચુસ્ત બની રહ્યો હતો.
આ કામગીરીમાં જિલ્લા પોલીસ તેમજ સ્થાનિક પ્રશાસનમાં નગરપાલિકા, દ્વારકા મામલતદાર, નાયબ મામલતદાર, ચીફ ઓફિસર સહિતના સ્ટાફ દ્વારા જરૂરી કાર્યવાહી કરવામાં આવી હતી જેમાં ત્રણ તબક્કાનું આ ઓપરેશન ડિમોલિશનનું આયોજન સફળ બની રહ્યું હતું.સમગ્ર રાજ્યમાં રેકોર્ડ રૂપ આ કામગીરીમાં સતત આઠ દિવસ તહેવાર કે રજા જોયા વગર સ્ટાફની આ કામગીરી કાબિલે દાદ બની રહી હતી. ઇન્ચાર્જ જિલ્લા કલેકટર એ.બી. પાંડોર દ્વારા પણ આ ઓપરેશનમાં જરૂરી માર્ગદર્શન આપવામાં આવ્યું હતું.
આ કામગીરીમાં તમામ દબાણકર્તાઓને નિયમ મુજબની બે-બે નોટિસો તેમજ જરૂરી મુદત અને ત્યાર બાદ 24 કલાકની આખરી નોટીસો પણ અપાઈ હતી. ડિમોલીશન પૂર્વે જે-તે સ્થળે જઈ, અને અધિકારીઓ- કર્મચારીઓ દ્વારા જે-તે આસામીઓ પાસેથી તેઓની જગ્યા કાયદેસર હોવાના આધારો અને રેકોર્ડ માંગવામાં આવ્યા બાદ તે ન મળતા દબાણ હટાવાયા હતા.દબાણ હટાવ કાર્યવાહી બાદ જે અસરગ્રસ્ત હોય તેમને ચાર-પાંચ દિવસ રહેવા તેમજ જમવાની વ્યવસ્થા સાથેના ટ્રાન્ઝિસ્ટ કેમ્પ પણ ખોલાયા હતા. જેથી તેઓ અન્ય વિકલ્પો શોધી શકે. આમ, આ સમગ્ર કાર્યવાહી પારદર્શક બની રહી હતી.
– બે તબક્કામાં રૂ. સવાસો કરોડની જમીન ખુલ્લી કરાવાઈ –
બેટ દ્વારકા સહિત જિલ્લામાં હાથ ધરવામાં આવેલા ઓપરેશન ડિમોલીશનમાં વર્ષ 2022 માં બેટ દ્વારકાના પ્રથમ રાઉન્ડમાં રૂપિયા 50 કરોડથી વધુની કિંમતની એક લાખ સાત હજાર ચોરસ મીટર જેટલી જમીન પરના પ્રેરણા ધાર્મિક અને કોમર્શિયલ દબાણો દૂર કરાયા હતા. આ પછી તાજેતરના બીજા રાઉન્ડમાં બેટ દ્વારકાના બાલાપર, ઓખા, દ્વારકા વિગેરે સ્થળોએથી એક લાખ 28 હજાર ચોરસ મીટર સરકારી જમીન પરના 525 દબાણો હટાવવામાં આવ્યા છે. આમ, તંત્ર દ્વારા આજ સુધી આશરે રૂપિયા સવાસો કરોડની કિંમતની સરકારી તેમજ ગૌચરની જમીનો ખુલ્લી કરાવાઈ છે.
