Mysamachar.in-દેવભૂમિ દ્વારકા
ખંભાળિયા- ભાણવડ રોડ ઉપર ગઈકાલે રવિવારે બપોરે જામનગરથી ભાણવડ જઈ રહેલા એક બાળક સાથેના દંપતીનું એક્ટિવા મોટરસાયકલ પૂરપાટ જતી બોલેરો પિકઅપ વાનની ઠોકરે ચડી જતા એક્ટિવામાં જઈ રહેલા માસુમ બાળક સહિત દંપતિના કરૂણ મૃત્યુ નિપજતા આ પરિવારનો માળો પીંખાઇ જવા પામ્યો છે, મળતી વિગત એવી છે કે ભાણવડના જુના નગરનાકા વિસ્તારમાં રહેતા અને ચાની હોટલ ધરાવતા કેતનભાઈ ડાયાભાઈ પરમાર નામના 39 વર્ષીય યુવાનના જામનગર ખાતે રહેતાં સસરાને કેન્સરની બીમારી હોવાથી તેઓ સારવાર હેઠળ દાખલ હતા.
બીમાર પિતાની તબિયતના ખબર કાઢવા કેતનભાઈના પત્ની જ્યોતિબેન (ઉ.વ. 35) તેઓના આઠ વર્ષના બાળક ઉદયને સાથે લઈને બે દિવસ પહેલા જામનગર ગયા હતા. જ્યાં ગઈકાલે રાત્રે ભાણવડથી કેતનભાઈ પણ તેમના એકટીવા મોટરસાયકલ નંબર જી.જે. 37ડી. 2130 માં આવ્યા હતા. પોતાના સસરાના ખબર- અંતર કાઢી અને પત્ની- પુત્રને ભાણવડ પોતાના ઘરે સાથે લઈને જવા માટે કેતનભાઈ તેમનાં પત્ની જ્યોતિબેન તથા પુત્ર ઉદય સાથે જામનગરથી ભાણવડ તરફ જવા નીકળ્યા હતા. નશીબ જોગે દર વખતે તેઓ જામનગરથી લાલપુર રોડ થઈ અને ભાણવડ જતા હતા. પરંતુ કામનશીબી કહો કે જાણે મોત પોકારતું હોય તેમ તેઓ ખંભાળિયા થઈ અને ભાણવડ જવા માટે નીકળ્યા હતા.
એવામાં આ એક્ટિવા સવાર દંપતિ-પુત્ર ખંભાળિયાથી આશરે આઠેક કિલોમીટર દૂર ભાણવડ રોડ ઉપર માંઝા ગામના પાટિયા પાસે પહોંચ્યા ત્યારે, સામેથી પૂરઝડપે અને બેફિકરાઈપૂર્વક આવી રહેલા જી.જે. 37 ટી. 3711 નંબરના એક બોલેરો પિકઅપ વાહનના ચાલકે કેતનભાઈના એક્ટિવાને ધડાકાભેર ટક્કર મારી હતી. જેના કારણે આ એકટીવાનો ભુક્કો બોલી ગયો હતો અને કેતન તથા તેમનાં પત્ની જ્યોતિબેને ઘટનાસ્થળે જ અંતિમ શ્વાસ ખેંચતા હતા. જ્યારે માસુમ બાળક ઉદયને ગંભીર રીતે ઈજાગ્રસ્ત હાલતમાં 108 મારફતે ખંભાળિયાની સિવિલ હોસ્પિટલમાં ખસેડવામાં આવ્યો હતો. બાદમાં વધુ સારવાર અર્થે ખસેડાતા તેનું પણ કરુણ મૃત્યુ નિપજ્યું હતું.
આ બનાવ બનતા ખંભાળિયા પોલીસ સ્ટાફ પણ ઘટનાસ્થળે તથા હોસ્પિટલ દોડી ગયો હતો અને જરૂરી કાર્યવાહી કરી હતી. ગમખ્વાર અકસ્માત સર્જી, બોલેરો ચાલક ઘટના સ્થળેથી નાસી ગયો હતો. વધુમાં જાણવા મળતી વિગત મુજબ કેતનભાઈ તેમના પિતા ડાયાભાઈનો એકમાત્ર પુત્ર હતો તેમને બે બહેનો છે. જ્યારે અકસ્માતમાં મૃત્યુ પામનાર કેતનભાઈ તથા જ્યોતિબેનનો ઉદય પણ એકમાત્ર જ સંતાન હતો. આ ગમખ્વાર અકસ્માતના કરૂણ બનાવે મૃતકના કોળી પરિવારમાં ઘેરા શોક સાથે ભાણવડ પંથકમાં પણ ભારે અરેરાટી પ્રસરાવી છે.
