Mysamachar.in-જામનગર
આમ તો આપણે ત્યાં દારૂ બાંધી છે, પણ દારૂબંધીના લીરા ઉડાડતા કિસ્સાઓ સમયાંતરે સામે આવતા જ રહે છે, આવો જ વધુ એક્ કિસ્સો જોડિયા તાલુકામાં સામે આવ્યો છે, જેમાં પોલીસને ચોક્કસ બાતમી મળી હતી કે એક કારમાં દારૂનો મોટો જથ્થો છે અને તે કાર ભાદરા તરફ આવી રહી છે પોલીસે બાતમીને આધારે વોચ ગોઠવી પીછો કરતા કાર પલટી ગઈ હતી અને અંદરથી દારૂનો મોટો જથ્થો મળી આવ્યો હતો, અંદાજે બે કિલોમીટર સુધી ભાગ્યા પછી એક કાર પલ્ટી મારી ગઈ હતી અને બીજી કાર દિવાલ સાથે અથડાતા એક બુટલેગર ઘવાયો હતો. અને અંતે પોલીસે 480 બોટલ દારૂ કબ્જે કરી આગળની કાર્યવાહી હાથ ધરી હતી.
જોડિયા તાલુકાના ભાદરા ગામના પાટીયા પાસે પોલીસ દ્વારા પેટ્રોલિંગ દરમિયાન બે કાર કચ્છ તરફથી આવી રહી હતી અને પોલીસે પૂર્વે બાતમીના આધારે બન્ને કારને રોકવાનો પ્રયત્ન કરતા બન્ને કારના ચાલકો ભાદરા પાટીયાથી લખતર ગામ તરફ કાર સાથે ભાગવા લાગ્યા હતાં. જેથી પોલીસે બન્નેનો પીછો અને બે ત્રણ કિલોમીટરની ધમાચકડીના અંતે GJ-07-BN-1151 નંબરની કાર લખતર ગામ નજીક પલ્ટી મારીને રોડથી નીચે ઉતરી ગઈ હતી. કારની અંદર બેઠેલો એક બુટલેગર ઇજાગ્રસ્ત થવાથી હોસ્પિટલમાં સારવાર કરાવી હતી. ઈજાગ્રસ્ત જયરાજસિંહ ખેતુભા સોઢા ગાંધીધામ કચ્છમાં રહેતો હોવાનું ખુલ્યું હતું. જેની પોલીસ દ્વારા અટકાયત કરી તેની કારની તલાસી લેતા તેમાંથી 190 દારૂની બોટલોનો જથ્થો અને કાર વગેરે 4 લાખનો મુદ્દામાલ કબજે કર્યો હતો.
આ ઉપરાંત તેની સાથે કાળા કલરની GJ-03-KP-7036 નંબરની એક કાર પણ દારૂનો જથ્થો લઇને આવી હતી અને તે કાર ચાલક પણ પોલીસને જોઇને ભાગ્યો હતો. કેશિયા ગામ નજીક આવેલા વીરા બા મંદિરની દિવાલ સાથે ટકરાઈ ગઈ હતી. અકસ્માત બાદ કારચાલક તેમાંથી ભાગી છૂટયો હતો. પોલીસે તે કારની તલાસી લેતા તેની અંદરથી જુદી જુદી બનાવટની 290 નંગ ઈંગ્લીશ દારૂની બોટલ તેમજ કાર સહિત રૂા.5 લાખ 70 હજારની માલમતા કબ્જે કરી લીધી હતી. જ્યારે કારના ચાલકની શોધખોળ હાથ ધરી છે. એક કાર સહીત 190 બોટલ દારૂ મળી રૂા. 4 લાખની કિંમતનો મુદ્દામાલ તેમજ રૂા.5 લાખની કિંમતની વર્ના કાર અને 5 હજારનો મોબાઇલ તથા 65800 ની કિંમતની 290 બોટલ દારૂ મળી કુલ રૂા.9,70,800 નો મુદ્દામાલ કબ્જે કર્યો હતો. આમ ફિલ્મી દ્રશ્યો જોડિયા નજીક સર્જાયા બાદ પોલીસની મોટી માત્રામાં દારૂ ઝડપી પાડવામાં સફળતા મળી હતી.
