Mysamachar.in-
રાજ્યના અન્ય કેટલાંક શહેરો માફક જામનગરમાં પણ ઝોનફેર મામલો, સૌ સંબંધિતોને ‘ફાવી’ ગયો છે. કારણ કે, આ બાબતમાં ગાંધીનગરની ‘સાથે’ રહી સ્થાનિક સ્તરે મનચાહી ‘ગોઠવણ’ કરવાની જગ્યાઓ રહેતી હોય છે. અગાઉના ઝોનફેર વિવાદો માફક આ વખતે પણ ઝોનફેર વિવાદ ચોક્કસ જગ્યાએથી બહાર લાવવામાં આવ્યો હોવાનું જાણવા મળે છે અને અગાઉની માફક આ વખતે પણ, વિવાદો વચ્ચે, કામ કરી લેવા ઈચ્છતા લોકો પોતાનું કામ સફળતાથી કરી જ લેશે, એમ સમજાઈ રહ્યું છે. દરમ્યાન, આ વખતે પણ વિવાદ સાથે-સાથે એક RTI અરજી દાખલ થઈ ગઈ છે.
જામનગરમાં થોડા-થોડા સમયે ઝોનફેર નામની ગાજવીજ શરૂ થઈ જાય છે અને આ ગાજવીજ વચ્ચે ઝોનફેરના કામ હેઠળ કેટલાંક લોકો પોતાનું કામ પતાવી લ્યે છે- જામનગર વિસ્તાર વિકાસ સત્તામંડળનો અત્યાર સુધીનો ઈતિહાસ આ વાતની સાક્ષી પૂરે છે. કોઈ પણ મહાનગરના વિકાસ માટે ઝોનફેર એક અગત્યની બાબત હોય છે. જે જરૂરી હોય છે. પરંતુ આ જરૂરી કામની પાછળના ‘ખેલ’ દર વખતે ચર્ચાઓમાં રહે છે.
દરમ્યાન, જામનગર મહાનગરપાલિકાની શિક્ષણ સમિતિના એક પૂર્વ સભ્ય નીતિન માડમએ ‘જાડા’માં આપેલી એક RTI અરજી અને આ અરજીમાં માગવામાં આવેલી માહિતીઓ હાલ ચર્ચાઓમાં છે. આ અરજીનો જો તંત્ર દ્વારા સાચો અને વિસ્તૃત જવાબ આપવામાં આવશે તો ‘જાડા’ની ઘણી વિગતો બહાર આવી જશે, એમ અત્યારે જણાઈ રહ્યું છે.
આ અરજીમાં જણાવાયું છે કે, ‘જાડા’ના વિકાસનકશા, તેના જાહેરનામા, પાંચ વર્ષ દરમ્યાનની ઝોન બદલવાની દરખાસ્તો, આ માટેના અધિનિયમો અને કલમો તથા તેના નોટિફિકેશન ઉપરાંત ઝોનફેર માટેના ઠરાવો, છેલ્લા 6 મહિનાઓ દરમ્યાન ઝોનફેર માટે થયેલી અરજીઓ, ઝોનફેર સંબંધિત પાંચ વર્ષ દરમ્યાનના તમામ કોર્ટ કેસની વિગતો, જાડા પાસે હાલ ફાજલ રહેલી જમીનો, જાડા દ્વારા વેચાણ કરવામાં આવતી જમીનોની વિગતો, જમીનોના વેચાણ સંબંધે ગાંધીનગર કક્ષાએથી થયેલી કાર્યવાહીઓ, જમીન વેચાણ માટેની કમિટી તથા જાડાના બોર્ડ અંગેની વિગતો, કમિટીઓની સતાઓ અને પાંચ વર્ષ દરમ્યાનના સરકયુલર ઠરાવની તેમજ ચેરમેનની સતાઓની માહિતીઓ તથા જાડાના સ્ટાફની વિગતો, કારોબારી સભા અને સામાન્ય સભાની કાર્યવાહીઓની માહિતીઓ, વિકાસનકશા ભંગના કિસ્સાઓની જાણકારીઓ અને જાડામાં ઠરાવો પસાર કરવાની સમગ્ર પ્રોસેસ અંગેની માહિતીઓ આ અરજીમાં માંગવામાં આવી છે, જેના પરથી દેખાઈ રહ્યું છે કે, આ વખતે પણ ઝોનફેર મામલો જામનગરમાં ગાજશે. આ અગાઉ એક વર્ષ પહેલાં અને ત્રણ વર્ષ અગાઉ પણ આ પ્રકારની ગાજવીજ થઈ હતી, જે અત્રે ઉલ્લેખનિય છે.
