Mysamachar.in-ભુજ:
એક દિવસ પણ રાજ્યમાં એવો નથી જતો કે અકસ્માતમાં કોઈ નું મોત ના થતું હોય દિનપ્રતિદિન અકસ્માતોની સંખ્યા હાઈવે પર વધી રહી છે ત્યારે વધુ એક અકસ્માત ગત સાંજે ભુજ જીલ્લામાં સામે આવ્યો છે, જ્યાં ભચાઉના બટિયા પુલ ઉપર પૂરપાટ જતી ઇનોવા કાર ટ્રકમાં ધડાકાભેર અથડાતાં બારમાં સવાર રાજકોટના ત્રણ પૈકી બે યુવાનના ઘટનાસ્થળે મોત નિપજ્યા હતા, તો એક યુવાનને ગંભીર હાલતમાં સારવાર અર્થે ભુજ ખસેડવામાં આવ્યો હતો. મોડી સાંજે બનેલી ઘટનામાં ગાંધીધામથી ભચાઉ જતા હાઇવે પર બટિયા પુલ પાસે સર્જાયેલા આ ગમખ્વાર અકસ્માતમાં ઇનોવા કાર ધડાકાભેર ટ્રકમાં અથડાઇ હતી.
અથડામણ એટલી જોરદાર હતી કે બે વાહનોને અલગ કરવા માટે ક્રેન બોલાવવી પડી હતી. ઇનોવા કારનો કચ્ચરઘાણ નિકળી ગયો હતો. કારમાં સવાર રાજકોટના ત્રણ યુવાનો પૈકી બે યુવાનના ઘટનાસ્થળે જ કમકમાટી ભર્યું મોત નિપજ્યું હતું તો ત્રીજા યુવાનને ગંભીર હાલતમાં 108 મારફત વધુ સારવાર અર્થે ભુજ ખસેડાયો હતો. અકસ્માતની જાણ થતાં જ ભચાઉ વિભાગના ડીવાયએસપી. કે.જી.ઝાલા સહિતનો પોલીસ સ્ટાફ ઘટનાસ્થળે ધસી ગયો હતો અને કારને ટ્રકમાંથી અલગ કરી આ અકસ્માતને પગલે જામ થયેલા ટ્રાફિકને પૂર્વવત કરાવ્યો હતો.
