Mysamachar.in-અમદાવાદ
રાજ્યના મેટ્રોસીટી અમદાવાદમાં સામે આવી છે આ ઘટના..જ્યાં એક વ્યક્તિએ પોતે પરિણીત હોવા છતાં હકીકત છૂપાવીને બીજી યુવતી સાથે લગ્ન કર્યા હતા. જોકે, યુવતીના હાથમાં યુવકના પ્રથમ લગ્નના ફોટોવાળું આલ્બમ લાગી જતા યુવકની પોલ ખુલી ગઈ, બાદમાં લગ્ન કર્યાં હોવા છતાં ઘરમાં પ્રવેશ ન આપતા પોલીસ ફરિયાદ દાખલ થઈ છે. અમદાવાદ શહેરના આશ્રમ રોડ શાંતિનગરમાં રહેતી એક મહિલાએ ઘાટલોડિયા પોલીસ સ્ટેશનમાં ફરિયાદ આપી છે કે વર્ષ 2011માં સમાજના અગ્રણી થકી તેમનો સંપર્ક ઘાટલોડિયામાં રહેતા પ્રિયાંક સાથે થયો હતો.
ટેલીફોનિક વાતચીતમાં બંનેએ ઇમેઇલની આપ લે કરી હતી. જેમાં પ્રિયાંકે ઓસ્ટ્રેલિયામાં MBA સહિત ઉચ્ચ શૈક્ષણિક લાયકાત મેળવી હોવાનું જણાવ્યું હતું. શૈક્ષણિક લાયકાત જોઈને યુવતીએ તેની સાથે લગ્ન કરવાનું નક્કી કર્યું હતું. સમાજના રીત-રિવાજ મુજબ બંનેએ લગ્ન કર્યા હતા.જોકે ઘરમાં રહેલા એક આલ્બમે યુવકની પોલ છતી કરી નાખી અને પોતે પોતાની પહેલી હકીકત છુપાવી બીજા લગ્ન કર્યાનું ખુલવા પામતા યુવતીના પગ નીચેથી જમીન સરકી ગઈ છે,
ફરિયાદી યુવતીના હાથમાં જે આલ્બમ આવ્યું જેને જોતા પતિના પહેલાના લગ્નના ફોટો તેણીએ જોયા હતા. આ બાબતની જાણ તેણીએ તેના પતિને કરતા પતિએ કહ્યુ હતુ કે, આ લગ્નના નહીં પરંતુ સગાઇના ફોટો છે. જે અંગે ફરિયાદીએ તપાસ કરતા જાણવા મળ્યું હતું કે તેના પતિએ વર્ષ 2008માં એક યુવતી સાથે લગ્ન કર્યા છે. આ વાત જાણ્યા બાદમાં બંને વચ્ચે અવારનવાર બોલાચાલી થતી હતી. મનમેળ ન થતા ફરિયાદી યુવતી તેના પતિથી અલગ રહેવા માટે ગઈ હતી. જોકે, અનેક વખત સમજાવ્યા બાદ પણ તેનો પતિ તેને રાખવા માટે તૈયાર ન થતાં યુવતીએ ઘાટલોડિયા પોલીસ મથકમાં ફરિયાદ નોંધાવતા પોલીસે આ મામલે સત્યો તપાસવાના શરુ કર્યા છે.
