જામનગર શહેર અને જિલ્લામાં વરસાદી વાતાવરણ વચ્ચે વધુ એક વખત 2 ઈંચ સુધીનો વરસાદ નોંધાયો છે. સૌથી વધુ વરસાદ જામજોધપુર તાલુકામથક અને તાલુકામાં નોંધાયો છે.
જિલ્લાના તાલુકામથક પૈકી જામનગર, જોડીયા, કાલાવડ અને ધ્રોલમાં માત્ર હળવા છાંટા નોંધાયા છે જયારે તાલુકામથક જામજોધપુર ખાતે પોણાં બે ઈંચ વરસાદ વરસ્યો છે. આ ઉપરાંત જિલ્લાના કેટલાંક ગ્રામ્ય વિસ્તારોમાં પણ વરસાદ નોંધાયો છે.
જિલ્લામાં સૌથી વધુ વરસાદ જામજોધપુર તાલુકાના જામવાડીમાં 2 ઈંચ વરસાદ થયો છે, આ ઉપરાંત આ તાલુકાના વાંસજાળીયા અને ધ્રાફામાં પોણાં બે ઈંચ વરસાદ થયો. આ સાથે જ તાલુકાના શેઠવડાળા, સમાણા અને પરડવામાં અડધો ઈંચ વરસાદ થયો છે.
જામજોધપુર તાલુકા ઉપરાંત લાલપુર તાલુકાના હરીપરમાં પોણા બે ઈંચ, મોડપર, પડાણા અને ભણગોરમાં ક્યાંક અડધો ઈંચ અને ક્યાંક અડધા ઈંચથી વધુ વરસાદ નોંધાયો છે. આ સાથે જ જામનગર તાલુકાના મોટી ભલસાણમાં સવા અને દરેડમાં એક ઈંચ વરસાદ થયો છે. કાલાવડ તાલુકાના મોટા પાંચ દેવડા અને નિકાવામાં પોણો પોણો ઇંચ વરસાદ નોંધાયો છે. વરસાદના આ બધાં જ આંકડાઓ આજે સવારે 6 વાગ્યે પૂર્ણ થયેલાં 24 કલાક દરમ્યાનના છે.
