Mysamachar.in-ગુજરાત:
હાલમાં લીંબુના ભાવમાં વધારો થતા મધ્યમવર્ગી પરિવારોનું બજેટ ગરમાઈ રહ્યું છે. હાલ લીંબુનો હોલસેલ બજારનો ભાવ 220 રૂપિયા કિલો ચાલી રહ્યો છે. જ્યારે રિટેઈલમાં 320 કિલો થઈ ગયા છે. આમ ગરમીથી રાહત આપવાવાળા લીંબુ લોકોના બજેટ ગરમ કરી રહ્યા છે.ઉનાળાની શરૂઆત થતાં લીંબુની માંગમાં એકાએક વધારો નોંધાય છે જેની સીધી અસર લીંબુના ભાવમાં જોવા મળે છે. વેપારીઓના જણાવ્યા મુજબ દરરોજ હોલસેલ માર્કેટમાં એક હજાર બોરી આવતી હતી તેની જગ્યા છેલ્લા બે દિવસથી માત્ર 100 જેટલી બોરી આવી રહી છે. જેના લીધે બજારમાં લીંબુની અછત ઉભી થઈ ગઈ છે. અત્રે નોંધનીય છે કે, મોંઘવારીનો પારો પણ વધી રહ્યો છે. ગરમીનો પારો વધતા લીલા શાકભાજી અને લીંબુના ભાવમાં વધારો થયો છે. દરેક શાકભાજીના પ્રતિ કિલોના ભાવમાં પાંચ થી દસ રૂપિયાનો વધારો થયો છે. તો લીંબુના ભાવ આસમાને પહોંચ્યા છે. હાલ લીંબુ 320 રૂપિયા પ્રતિકિલોના ભાવે મળી રહ્યા છે.
સોશ્યલ મીડિયામાં લીંબુના ભાવ વધારાને લઈને કેટલાક રમુજી મેસેજ ફરી રહ્યા છે તે…
– હે દોસ્ત, ન કર દાવો ગરીબ હોવાનો, મેં તને જોયો છે, લીંબુવાળી સોડા પીતા..
– ‘નજર ઉતારવાની ચીજોને નજર લાગી; લીલા મરચાં દોઢસોના કિલો, લીંબું 15નું એક’
– સાલું, સમજાતું નથી કે લીંબુ સરબત પીવાનું કે સફરજનનું મિલ્કશેક..
– ભાઇ, એ વિચારું છુ કે, આઇપીઓ ભર્યા, એના કરતાં લીંબુ ભરી દીધા હોય તો સારું હતું..
– મેરે પાસ ગાડી હૈં, બંગલા હૈં, બેંક બેલેન્સ હૈં. તેરે પાસ ક્યા હૈં..: મેરે પાસ લીંબુ હૈં…
– ભાઇ, એક લીંબુ કેટલાનું?? બકાલી : એક લીંબુંના 15 રૂપિયા.
– બેન: ઊભા રહ્યો, હું અંદરથી દાળનું કૂકર લઇને આવું છું. એમાં 3 રૂપિયાનું નિચોવી દયો ને..
– બજારમાં લીંબુ કરતાં સફરજન સસ્તા થઇ ગયા છે.
-શાકમાં મીઠું અને મરચું માપમાં પણ લીંબુ ત્રેવડ મુજબ
-પેટ્રોલ અને ડીઝલના ભાવને ટક્કર મારતો એક માત્ર વિકલ્પ એટલે લીંબુ
-199 ના એક પિત્ઝા ખાતી યુવા પેઢીને 200 ના કિલો લીંબુ મોંઘા લાગે છે.
