Mysamachar.in-સુરત
સુરત શહેરમાં આવેલા બેગમપુરા વિસ્તારના તુલસી ફળિયામાં ચાલતાં જુગારધામ પર આજે પોલીસ દ્વારા દરોડા પાડવામાં આવ્યાં છે. જે રીતે પ્રાથમિક માહિતી સામે આવી છે તે પ્રમાણે સ્ટેટ મોનિટરીંગ સેલના આ દરોડામાં 80થી વધુ જુગારી ઝડપાયા છે. સ્થાનિક સ્તરે કુખ્યાત આસિફ ગાંડાના જુગારધામ પરના આ દરોડામાં પોલીસને લાખો રૂપિયાનો મુદ્દામાલ પણ મળી આવ્યો છે. સ્ટેટની ટીમે દરોડા પાડ્યા બાદ સ્થાનિક લોકો સાથે ઘર્ષણના પગલે કંટ્રોલરૂમમાં જાણ કરી વધુ ફોર્સ બોલાવાઈ હતી. હાલ પોલીસે આરોપીને ઝડપી લઈ વધુ તપાસ હાથ ધરી છે.
જે જુગારધામ પર સ્ટેટ મોનીટરીંગ સેલ દ્વારા રેડ કરવામાં આવી છે, તે જુગારધામ શટર બંધ કરીને ચાલતું હતું. જેથી સૌ પ્રથમ સ્ટેટની ટીમે શટર તોડીને અંદર પ્રવેશ કર્યો હતો. પોલીસની રેડની જાણ થતાં જ જુગારીઓમાં દોડધામ મચી ગઈ હતી. સુરતના બેગમપુરા વિસ્તારમાં આવેલું બે માળનું એરકન્ડિશન્ડ જુગારધામ ઝડપાયું છે. પોલીસે રેડ દરમિયાન બન્ને માળમાં આરોપીઓને જુગાર રમતાં રંગેહાથ પકડી લીધાં છે. આરોપીઓ હારજીતનો જુગાર રમતા હોવાથી પોલીસે તમામને ઝડપી લઈને કાયદેસરની કાર્યવાહી હાથ ધરી છે.આ હાલ પ્રાથમિક સામે આવેલ માહિતી છે સ્થળ પરથી પોલીસ મોબાઈલફોન, રોકડા, વાહનો સહિતનો મુદામાલ કબજે કરવાની કાર્યવાહી ચાલી રહી છે.
