Mysamachar.in-ગાંધીનગર:
વાત ગાંધીનગરની છે… આજે વહેલી સવારે અહીં એક સ્કૂલવાન પલટી ખાઇ ગઇ હોવાની ઘટના બની છે. સવારે વાનચાલક બાળકોને લઇને સ્કૂલે મૂકવા જઇ રહ્યો હતો, ત્યારે અચાનક જ કાર પલટી મારી ગઇ હતી. ગાંધીનગરના ચ-6 રોડ પર આ અકસ્માત સર્જાયો હતો. આ અકસ્માતમાં 10 જેટલા બાળકોને ઇજા પહોંચી હોવાનું જાણવા મળી રહ્યું છે. આજે સવારે ગાંધીનગરના ચ-6 રોડ પર સ્કૂલ વાન પલટી મારી ગઇ હતી. આ વાનમાં બાળકો સવાર હતા. વાનમાં સ્કૂલે જઇ રહેલા 10 જેટલા વિદ્યાર્થીઓ ઇજાગ્રસ્ત થાય છે. અકસ્માતને પગલે 108ની ટીમ દોડી આવી હતી અને ઇજાગ્રસ્ત બાળકોને સારવાર અર્થે ગાંધીનગર સિવિલ હોસ્પિટલ ખસેડવામાં આવ્યા છે.
સાથે જ એક વિદ્યાર્થીને વધુ ઇજા પહોંચતા તેને સારવાર માટે અમદાવાદ ખસેડવામાં આવ્યો છે. અકસ્માતના સમાચાર મળતાં જ વાલીઓ પણ દોડી આવ્યા હતા. ઉલ્લેખનીય છે કે, વહેલી સવારે સ્કૂલ વાન પલટી મારી જતાં રોડ પર મોટી સંખ્યામાં લોકો એકઠા થઇ ગયા હતા. લોકોએ પલટી મારી ગયેલી વાનમાં સવાર બાળકોને બહાર કાઢવાનો પ્રયાસ કર્યો હતો. જ્યારે પલટી મારી ગયેલી વાનને સીધી કરી બચાવ કામગીરી હાથ ધરી હતી.
