Mysamachar.in:અમદાવાદ
રાજ્યમાં વધુ એક ગંભીર અકસ્માતની ઘટના સામે આવી છે. અમદાવાદ-મહેસાણા હાઇવે પર ગમખ્વાર અકસ્માત સર્જાયો છે, જેમાં ત્રણ લોકોનાં મોત નિપજ્યાં છે. અકસ્માત છત્રાલ પાસે સર્જાયો હતો. મળતી માહિતી અનુસાર, રસ્તો ક્રોસ કરતી વખતે આ ગંભીર અકસ્માત સર્જાયો હતો. પૂરપાટ ઝડપે આવી રહેલી કારે અડફેટે લેતાં ત્રણ લોકોનાં ઘટનાસ્થળે મોત નિપજ્યાં હતાં. આ અકસ્માતમાં મૃત્યુ પામનાર ત્રણેય શ્રમિક હોવાનું જાણવા મળી રહ્યું છે.
કડીના નંદાસણ-છત્રાલ હાઈવે ઉપર આવેલા કલોલ તાલુકાના બિલેશ્વરપુરા પાટિયા પાસે અકસ્માત સર્જાયો હતો, જેમાં ત્રણ લોકોનાં મોત થયાં હતાં. જોટાણા તાલુકાના હરચંદજી (ઉં.વ.54), અમૃતબેન (ઉં.વ.50) તેમજ કાળાજી ઠાકોર આ ત્રણેય લોકો પોતાના વતને મુદરડા ગામેથી મજૂરીકામ કરવા માટે રિક્ષામાં નીકળ્યા હતા. મહેસાણા વોટરપાર્ક થઈને નંદાસણ થઈ છત્રાલ પાસે આવેલા કલોલ તાલુકાના બિલેશ્વર પાટિયા પાસે ઊતર્યાં હતાં. ત્યાર બાદ તેઓ પેસ્ટિજ હોટલ સામેની બાજુ રોડ ક્રોસ કરીને જઈ રહ્યાં હતાં. ત્યારે છત્રાલ તરફથી આવતી સ્વિફ્ટ ગાડીએ તેમને ધડાકાભેર ટક્કર મારી હતી, જ્યાં ત્રણેય જણા હવામાં ફંગોળાયાં હતાં અને રોડ ઉપર પછડાતાં તેમનાં ઘટનાસ્થળે જ કરુણ મોત નીપજ્યાં હતાં.
