સમગ્ર સૌરાષ્ટ્ર ગુજરાતની સાથેસાથે જામનગર જિલ્લામાં પણ વરસાદનો વધુ એક રાઉન્ડ વરસી ગયો છે. જિલ્લાના તાલુકામથક કાલાવડ ખાતે માત્ર 2 જ કલાકમાં 5 ઈંચ પાણી વરસી પડ્યું છે. તાલુકાના અન્ય વિસ્તારોમાં પણ વરસાદ વરસ્યો છે. આ ઉપરાંત જામજોધપુર સહિતના અન્ય તાલુકાઓમાં પણ વરસાદ નોંધાયો છે.
આજે સવારે 6 વાગ્યે પૂર્ણ થયેલાં 24 કલાક દરમ્યાન જામનગર શહેર અને જિલ્લામાં લગભગ બધે જ હળવાથી માંડીને નોંધપાત્ર સુધીનો વરસાદ વરસ્યો છે. જે પૈકી સૌથી વધુ વરસાદ કાલાવડ તાલુકામથકે નોંધાયો છે. કાલાવડમાં ગઈકાલે બુધવારે સવારે 10 થી 12 વાગ્યા દરમ્યાન વરસાદનું એકદમ વાતાવરણ તૈયાર થઈ ગયું હતું અને હળવા છાંટા પણ પડ્યા હતાં. ત્યારબાદ બપોરે 12 થી 2 વાગ્યા દરમ્યાન ધોધમાર 5 ઈંચ વરસાદ વરસી જતાં સમગ્ર કાલાવડ ટાઉન પાણીપાણી થઈ ગયું હતું. જો કે કોઈ અનિચ્છનીય બનાવ બન્યો નથી.
આ વીતેલા 24 કલાક દરમ્યાન જામનગર જિલ્લાના અન્ય તાલુકામથકો પૈકી લાલપુર અને ધ્રોલ ખાતે અડધો અડધો ઈંચ વરસાદ વરસ્યો હતો. બાકીના તાલુકામથકો જામનગર, જોડીયા અને જામજોધપુર ખાતે માત્ર હળવા છાંટા નોંધાયા હતાં. જો કે વિવિધ તાલુકાના ગ્રામ્ય વિસ્તારોમાં નોંધપાત્ર વરસાદ થયાનો રિપોર્ટ છે.
પાછલાં 24 કલાકના વરસાદના સત્તાવાર આંકડાઓ અનુસાર, કાલાવડ તાલુકાના મોટા વડાળા ખાતે અઢી ઈંચ વરસાદ, નવાગામ અને મોટી પાંચ દેવડા ખાતે સવા સવા ઈંચ વરસાદ, ભલસાણ બેરાજા તથા ખરેડી ખાતે અડધો અડધો ઈંચ વરસાદ થયો છે.
આ ઉપરાંત જામજોધપુરના વાંસજાળીયા ખાતે પોણાં બે ઈંચ, સમાણા, ધૂનડા અને પરડવા ખાતે એક એક ઈંચ તથા તાલુકાના અન્ય ગ્રામ્ય વિસ્તારોમાં હળવા છાંટા વરસ્યા હતાં. આ સાથે લાલપુર તાલુકામાં હરીપર ખાતે એક ઈંચ અને ભણગોર, મોટા ખડબા તથા મોડપરમાં અડધો ઈંચ વરસાદ થયો. ધ્રોલના લતીપુર અને લૈયારામાં અડધો ઈંચ, જોડીયાના બાલંભામાં અડધો ઈંચ અને જામનગર તાલુકામાં હળવા છાંટા નોંધાયા છે.
