Mysamachar.in-જામનગર:
ગત્ શનિવારે સવારમાં હવામાન વિભાગે આગાહી કરી હતી કે, આજે શનિવારે જામનગર અને દેવભૂમિ દ્વારકા સહિતના જિલ્લાઓમાં હળવાથી મધ્યમ પ્રકારનો વરસાદ વરસી શકે છે. આ ઉપરાંત આગાહીમાં એમ પણ કહેવાયું હતું કે, સૌરાષ્ટ્ર ગુજરાતમાં 19 થી 22 જૂલાઈ સુધી વરસાદનો વધુ એક રાઉન્ડ જોવા મળી શકે છે. આ શનિ-રવિવાર દરમ્યાન જામનગર જિલ્લામાં નોંધપાત્ર વરસાદ વરસ્યો છે.
જામનગર શહેર અને જિલ્લામાં શનિવારે વરસાદી વાતાવરણ રહ્યું હતું અને ખાસ કરીને જિલ્લાના ગ્રામ્ય વિસ્તારોમાં પોણાં ચાર ઈંચ સુધીનો વરસાદ વરસી ગયો હતો. ઘણી જગ્યાઓ પર પાણી ભરાયા હતાં. વાતાવરણમાં ઠંડક પ્રસરી હતી અને ગ્રામ્ય વિસ્તારોમાં નોંધપાત્ર વરસાદ થતાં ખેડૂતો સહિતના ગ્રામજનો ખુશખુશાલ છે.
શનિવારે જામનગર જિલ્લામાં કાલાવડ તાલુકાને બાદ કરતાં બાકીના પાંચેય તાલુકામાં ઓછો વધતો પોણાં ચારેક ઈંચ સુધીનો વરસાદ વરસ્યો. ખાસ કરીને, જામનગર તાલુકાના મોટી ભલસાણમાં આ સૌથી વધુ વરસાદ નોંધાયો. આ ઉપરાંત જોડીયાના હડીયાણા, પીઠડ, ધ્રોલ તાલુકાના લતીપુરમાં બે ઈંચ આસપાસ વરસાદ વરસી ગયો. જામજોધપુર અને લાલપુર તાલુકાના ગ્રામ્ય વિસ્તારોમાં પણ અડધાથી માંડીને બે ઈંચ સુધીનો વરસાદ નોંધાયો હતો.
-પાછલાં 24 કલાકમાં ક્યાં ક્યાં વરસાદ ? સૌથી વધુ ક્યાં ?…
આજે સોમવારે સવારે 6 વાગ્યે પૂર્ણ થયેલાં 24 કલાક દરમ્યાન તાલુકામથકો પૈકી જોડીયામાં સૌથી વધુ સવાત્રણ ઈંચ વરસાદ નોંધાયો છે. જામજોધપુરમાં દોઢ અને જામનગર તથા ધ્રોલમાં એક એક ઈંચ તથા કાલાવડમાં અડધો ઈંચ વરસાદ નોંધાયો છે. લાલપુરમાં હળવા છાંટા પડ્યા હતાં. જો કે વરસાદી વાતાવરણ સમગ્ર જિલ્લામાં અનુભવાયું હતું.
આ 24 કલાક દરમ્યાન જિલ્લાના ગ્રામ્ય વિસ્તારો પૈકી સૌથી વધુ લાલપુરના હરીપરમાં 6 ઈંચથી વધુ વરસાદ નોંધાયો છે. આ ઉપરાંત જામનગર તાલુકાના મોટી ભલસાણ ખાતે વધુ એક વખત મેઘરાજા મન મૂકી સાડા પાંચ ઈંચ જેટલું વરસી ગયા. આ સાથે જ જોડીયાના બાલંભામાં ચાર ઈંચ આસપાસ વરસાદ નોંધાયો.
આ રીતે આજે સવારે 6 વાગ્યે પૂર્ણ થયેલા 24 કલાક દરમ્યાન, જામવંથલી પોણા બે ઈંચ, અલીયાબાડા સવા ઈંચ, હડીયાણા દોઢ ઈંચ, જાલીયાદેવાણી અને લૈયારા એક એક ઈંચ, કાલાવડના નિકાવા, ખરેડી, ભલસાણ બેરાજા, નવાગામ, મોટા પાંચ દેવડા પંથકોમાં એક દોઢ ઇંચ વરસાદ થયો. જામજોધપુરના ધ્રાફા, પરડવા તથા શેઠવડાળામાં પણ એક દોઢ ઈંચ વરસાદ થયો છે. આ સાથે જ લાલપુર તાલુકાના પીપરટોડામાં અઢી ઈંચ વરસાદ નોંધાયો છે. તાલુકાના અન્ય ગ્રામ્ય વિસ્તારોમાં પણ હળવો વરસાદ વરસ્યો હતો
