Mysamachar.in-દેવભૂમિ દ્વારકા:
ખંભાળિયા નજીકથી થોડા સમય પૂર્વે ઝડપાયેલા બોકસાઈટ ભરેલા ટ્રક સંદર્ભે ચાર શખ્સો દ્વારા મિલીભગત આચરીને આ ખનીજની બનાવટી ટેક્સ ઇન્વોઇસ (બિલ) બનાવીને સરકાર સાથે છેતરપિંડી આચર્યા સબબની પોલીસ ફરિયાદ નોંધાઈ છે.આ સમગ્ર પ્રકરણ અંગે ખંભાળિયામાં રામનાથ સોસાયટી વિસ્તારમાં રહેતા અને ખાણ ખનીજ કચેરીમાં રોયલ્ટી ઇન્સ્પેક્ટર તરીકે ફરજ બજાવતા અંકુરકુમાર જગદીશભાઈ ભાદરકાએ જામનગરમાં રહેતા અને એક ડમ્પરના માલિક એવા અજય ભાદરકા, ખંભાળિયા તાલુકાના દાત્રાણા ગામના રહીશ અશોક ભીમશી ચાવડા, નંદાણા ગામના દેવાણંદ ચાવડા અને મહાવીરસિંહ બટુકસિંહ વાઢેર સામે ખંભાળિયા પોલીસ મથકમાં નોંધાવેલી ફરિયાદમાં જણાવાયું છે કે
આરોપીઓએ પોતાના અંગત ફાયદા માટે પૂર્વયોજિત કાવતરું રચી અને આરોપી મહાવીરસિંહ બટુકસિંહ વાઢેરના કહેવા મુજબ જી.જે. 36 વી 0549 નંબરના ડમ્પરના માલિક અજય ભાદરકા અને અશોક ભીમશી ચાવડાએ અન્ય એક આરોપી દેવાણંદ ચાવડાને સાથે રાખીને કલ્યાણપુર તાલુકાના ખાખરડા ગામની સીમમાંથી બિન અધિકૃત રીતે રો-બોક્સાઈટ ખનીજ 32.605 મેટ્રિક ટનનો જથ્થો ટ્રકમાં ભરીને આરોપી અશોક અને મહાવીરસિંહએ સરકાર સાથે છેતરપિંડી કરવાના ઈરાદાથી આ ટ્રકમાં રો-બોક્સાઈટ ભર્યું હતું. તેનું સેમી કેલ્સાઈન બોક્સાઈટનું બનાવટી ટેક્સ ઈન્વોઈસ બિલ બનાવી આ બનાવટી બિલને ખરા તરીકે રજૂ કરી બોકસાઈટ ખનીજ વહન કરવામાં આ બિલનો ઉપયોગ કર્યો હતો.
આમ, આરોપીઓ દ્વારા બોકસાઈટ ખનીજનું અનધિકૃત રીતે વહન કરીને સરકારના કિંમતી બોકસાઈટ ખનીજની ચોરી કરી, નાણાકીય તિજોરીમાં આર્થિક નુકસાન કરવા ખંભાળિયા પોલીસે ઉપરોક્ત ચારેય આરોપીઓ સામે આઈ.પી.સી. કલમ 465, 467, 468, 471, 120 (બી) તથા માઈન્સ એન્ડ મિનરલ એક્ટ અને ગુજરાત મિનરલ પ્રીવેન્શન ઓફ ઈલ-લીગલ માઈનિંગ, ટ્રાન્સપોર્ટેશન એન્ડ સ્ટોરેજ રૂલ્સ સહિતની જુદી જુદી કલમ હેઠળ ગુનો નોંધ્યો છે. આ પ્રકરણમાં આગળની તપાસ અહીંના પી.આઈ. બી.જે. સરવૈયા દ્વારા હાથ ધરવામાં આવી છે.
