Mysamachar.in-જામનગર:
જામનગરની જીજી હોસ્પિટલમાં સેંકડો આઉટસોર્સ કર્મચારીઓને દર મહિને વેતન સહિતના લાખો રૂપિયાના ચૂકવણા કરવાની પ્રક્રિયાઓમાં ‘જગ્યા’ શોધી લઈ 2 કર્મચારીઓએ સરકાર સાથે કરેલી છેતરપિંડીનો મામલો હવે ઘાટો થઈ ગયો છે. કારણ કે, એક તરફ ગાંધીનગરની ખાસ ટીમ મામલાની તપાસ ચલાવી રહી છે, બીજી તરફ સ્થાનિક પોલીસ આ કુંડાળાઓની બારીકીનો અભ્યાસ કરી રહી છે.
અત્યંત આધારભૂત સૂત્રના જણાવ્યા અનુસાર, હોસ્પિટલમાં આઉટસોર્સના સેંકડો કર્મચારીઓ છે. આ કર્મચારીઓને દર મહિને ચૂકવવાના થતાં વેતન સહિતના નાણાંની ચૂકવણીઓ માટે હજારો વાઉચર સહિતના કાગળો તૈયાર કરવા પડતાં હોય છે. આ બધાં જ કાગળો યોગ્ય રીતે તૈયાર કરવામાં આવતા હતાં કે તેમાં કોઈ કારીગીરી કરવામાં આવતી હતી- તેની તપાસ એકસાથે 2 ટ્રેક પર ચાલી રહી છે.
આ સેંકડો આઉટસોર્સ કર્મચારીઓના વેતન સહિતના ખર્ચના વાઉચર અને વાઉચર સામે નાણાંની ચૂકવણીઓ- આ એક મોટી પ્રોસેસ છે. જેમાં ગેરરીતિઓ આચરવાના આરોપસર એક યુવતી સહિત 2 વિરુદ્ધ ફરિયાદ દાખલ થઈ ગયા પછી હવે તપાસ માટે ગાંધીનગરથી આવેલી ટીમ અને સિટી બી ડિવિઝન પોલીસ સ્ટેશનની ટીમ દ્વારા ઝીણવટથી તમામ સંબંધિત કાગળોની ચકાસણીઓ કરવામાં આવી રહી છે.
પોલીસસૂત્રના જણાવ્યા અનુસાર, આશરે એક હજાર જેટલાં આઉટસોર્સ કર્મચારીઓને અત્યાર સુધીમાં થયેલા ચૂકવણાનો અભ્યાસ ચાલી રહ્યો છે. તેમાં અનિયમિતતાઓ બહાર આવી શકે છે. કેમ કે આરોપીઓ લાંબા સમયથી આ સમગ્ર વ્યવસ્થાઓ સાથે સંકળાયેલા હતાં.
તપાસનીશ અધિકારી પીએસઆઈ જે.પી.સોઢાએ આજે બપોરે Mysamachar.in સાથેની ટેલિફોનિક વાતચીતમાં જણાવ્યું કે, હાલમાં આ ઉચાપત પ્રકરણના બંને આરોપીઓ વિરુદ્ધ તપાસના કામે દસ્તાવેજી પુરાવાઓ એકત્ર કરવાની કામગીરીઓ ચાલી રહી છે, જરૂરી પુરાવાઓ એકત્ર થયે બંને આરોપીઓની અટકાયત કરી પુરાવાઓ સાથે અદાલત સમક્ષ પેશ કરવામાં આવશે.
-કૌભાંડ થઈ શકે એવી ઘણી ‘જગ્યાઓ’ હોય છે !!
અત્યંત આધારભૂત સૂત્રના કહેવા અનુસાર, જે આઉટસોર્સ કર્મચારીઓ જુદાજુદા કારણોસર નોકરીમાં હાજર ન હોય એ દિવસે કે એ દિવસોમાં પણ કાગળો પર જેતે કર્મચારીને ‘હાજર’ દેખાડી તે સંબંધિત નાણાંનો વહીવટ કરી શકાતો હોય છે. આ ઉપરાંત ધારો કે 900 કર્મચારીઓ નોકરીઓ કરતાં હોય અને 1,000-1,200 કર્મચારીઓ ‘કાગળ’ પર દેખાડી દેવામાં આવે અને સૌની સામેલગીરીથી સરકારની તિજોરીમાંથી વધારાના નાણાં ‘ઉસેડી’ લેવામાં આવતું હોય તેમ પણ બની શકે છે. જો કે આ બધી આશંકાઓ તપાસ બાદ જ હકીકતના રૂપમાં બહાર આવી શકે. હાલ ગાંધીનગર ટીમ અને સ્થાનિક પોલીસની ટીમ તપાસ માટે ‘ઉંડે’ સુધી જવાની દિશામાં આગળ વધી રહી
