Mysamachar.in-જામનગર:
જામનગર મહાનગરપાલિકાની સ્ટેન્ડિંગ કમિટીની બેઠક આજે ગુરૂવારે કમિટીના સભાખંડમાં ચેરમેનના અધ્યક્ષપદે યોજવામાં આવી હતી, જેમાં કમિશનર દ્વારા મહાનગરપાલિકાનું વર્ષ 2025-26 માટેનું અંદાજપત્ર તથા વર્ષ 2024-25નું સુધારેલું અંદાજપત્ર ચેરમેનને સોંપવામાં આવ્યું. આ તકે મેયર તથા ડેપ્યુટી મેયર ઉપસ્થિત રહ્યા હતાં.
કમિશનર ડી.એન. મોદીએ આજે આગામી નાણાંકીય વર્ષ 2025-26 માટે જે બજેટ ડ્રાફ્ટ ચેરમેન નિલેષ કગથરાને સોંપ્યો તેમાં મોટાભાગના ચાર્જીસમાં વધારો સૂચવવામાં આવ્યો છે અને વધારામાં નગરજનો પાસેથી નવા પ્રકારના અન્ય ચાર્જીસ વસૂલવા પણ કમિશનરે સૂચવ્યું છે. આગામી વર્ષે નગરજનો માટે પાણી પણ મોંઘુ થશે એમ આ ડ્રાફ્ટ બજેટ કહે છે.
જો કે, જામનગર મહાનગરપાલિકાની કાર્યપદ્ધતિ એવી રહી છે કે, પ્રથમ કમિશનર દ્વારા કરદર વધારા સૂચવવામાં આવે, પછી શાસકો દ્વારા આ વધારા રદ્દ કરવામાં આવે અથવા અંશત: વધારાને લીલીઝંડી આપવામાં આવે. પરંતુ આગામી વર્ષે મહાનગરપાલિકાની ચૂંટણીઓ આવી રહી હોય, શાસકો નગરજનોનું ધ્યાન રાખશે એવી લાગણીઓ વ્યક્ત થઈ રહી છે. તેની સામે એમ પણ માનવામાં આવે છે કે, કમિશનર દ્વારા નગરજનો પર વધારાનો જે બોજ સૂચવવામાં આવ્યો છે, તે બહુ મોટો ન હોય, શક્ય છે કે, મહાનગરપાલિકાની તિજોરીને સમૃધ્ધ બનાવવા શાસકો આ નાનો વધારો માન્ય પણ રાખી શકે છે.
મેયર વિનોદ ખીમસૂર્યા અને ડેપ્યુટી મેયર ક્રિષ્નાબેન સોઢાની ઉપસ્થિતિમાં કમિશનરે ચેરમેનને સોંપેલા બજેટ ડ્રાફ્ટમાં જણાવાયું છે કે, રહેણાંક હેતુ માટેના ફીક્સ નળ જોડાણ માટે રૂ. 1,300ની જગ્યાએ રૂ. 1,400 પ્રતિ વર્ષ અને સ્લમ વિસ્તાર માટે રૂ. 650ની જગ્યાએ રૂ. 700 કરવા સૂચન કરવામાં આવેલ છે.
આ ઉપરાંત વાહન ટેક્સમાં વધારો, ટાઉનહોલ ભાડા તથા ડીપોઝીટમાં વધારો, સોલિડ વેસ્ટ કલેક્શન ચાર્જમાં રૂ. 25 સુધીનો વધારો, ગ્રીનરી ચાર્જમાં 150 ટકાથી માંડીને 300 ટકા સુધીનો વધારો, ભૂગર્ભ ગટર હાઉસ કનેક્શન ચાર્જ બમણો કે તેથી વધુ કરવા, ફાયર ચાર્જીસમાં વધારો, દવાખાના ચાર્જ બમણો, સામૂહિક આરોગ્ય કેન્દ્રનો ઉપયોગ કરનારાઓ પાસેથી ચાર્જ વસૂલવા નવી દરખાસ્ત, ફૂડ ટેસ્ટિંગ ચાર્જ નવા ચાર્જ તરીકે શરૂ કરવા, રણમલ તળાવ, એમ્યુઝમેન્ટ પાર્ક, રણજિતસાગર પાર્ક, સંગીત ફુવારો તથા લેઝર શોની સેવા મોંઘી કરવા, તળાવ પર ચાલવું મોંઘુ કરવા તથા સ્ટ્રીટ લાઈટ ચાર્જ ડબલ કરી નાંખવા તેમજ આ બધાં વધારાથી નગરજનો પર હાલના વેરા ચાર્જીસ ઉપરાંત વધારાના રૂ. 12 કરોડ જેટલાં ચાર્જીસ વસૂલવા સૂચવવામાં આવેલ છે.
આ બજેટ કહે છે: વર્ષ 2025-26 દરમિયાન મહાનગરપાલિકાને કુલ આશરે રૂ. 1,430 કરોડની આવકનો અંદાજ છે અને તેની સામે વર્ષ દરમિયાન રૂ. 1,493 કરોડનો ખર્ચનો અંદાજ માંડવામાં આવ્યો છે. તા.01-04-2025ના દિવસે મહાનગરપાલિકા પાસે હાથ પર રૂ. 388.94 કરોડ હશે. વર્ષ પૂરૂં થશે ત્યારે એટલે કે તા.31-03-2026ના દિવસે કોર્પોરેશન પાસે બંધ સિલક તરીકે રૂ. 325.94 કરોડ રહેશે.
રિવરફ્રન્ટ પ્રોજેક્ટ અંગે હાલ કોઈ નવા સમાચાર નથી. મલ્ટી પરપઝ ઓડિટોરીયમ આવતા વર્ષમાં બનાવવામાં આવશે. સાયન્સ નોલેજ પાર્ક નિયત સમયમાં બની જશે. બે નવા ફાયર સ્ટેશન બનશે. ફૂટબોલ મેદાન બનશે. પાણી તથા રોડ રસ્તાઓ ના કામો થશે. નવી ગૌશાળા બનાવવામાં આવશે. ત્રીજા સ્મશાન અંગે કોઈ જ સ્પષ્ટતાઓ કરવામાં આવી નથી. આધુનિક ફૂડ ટેસ્ટિંગ લેબોરેટરી બનાવવામાં આવશે.
