Mysamachar.in: જામનગર
જામનગર સહિત સમગ્ર હાલારમાં લોકસભા ચૂંટણીઓનો માહોલ શરૂ થઈ ગયો છે. રાજકીય પક્ષોમાં ભારે સંચાર જોવા મળી રહ્યો છે. બીજી તરફ મોટી ચૂંટણીઓ હોય કાર્યકર્તાઓમાં પણ ખૂબ જ ઉમંગ દેખાઈ રહ્યો છે. એવામાં સંગઠનની બાબતમાં હંમેશા બે કદમ આગળ રહેતી ભારતીય જનતા પાર્ટીએ ચૂંટણીઓ માટેના પોતાના મધ્યસ્થ કાર્યાલયો ધડાધડ ખોલવાનું શરૂ કરી દીધું છે. આ ચૂંટણી કવાયતના ભાગરૂપે ગત્ રવિવારે સાંજે ભારતીય જનતા પાર્ટી દ્વારા શહેરના સરૂ સેક્શન રોડ પર જામનગર ઉત્તર વિધાનસભા મતવિસ્તાર માટેના મધ્યસ્થ ચૂંટણી કાર્યાલયનો પ્રારંભ દબદબાભેર કરી દીધો છે. આ તકે જબ્બર લોકમેળા જેવો માહોલ જોવા મળતો હતો. બીજેપીના લોકસભા ઉમેદવાર અને બે ટર્મથી સાંસદ પૂનમબેન માડમના હસ્તે આ ઉદઘાટન સમારોહ યોજવામાં આવ્યો હતો.
આગામી લોકસભા ચૂંટણી અન્વયે જામનગર-દેવભૂમિ દ્વારકા સંસદીયમત વિસ્તાર અંતર્ગત 78 વિધાનસભા મધ્યસ્થ કાર્યાલયનો ઉદઘાટન કાર્યક્રમ તાજેતરમાં જામનગરમાં યોજાયો હતો. વૈદિક, મંત્રોચાર સાથે જામનગર ઉત્તર 78 વિધાનસભા મધ્યસ્થ કાર્યાલયનો ઉદઘાટન કાર્યક્રમ યોજાયો. જંગી મેદની સાથે આ કાર્યક્રમ સંપન્ન થયો. કાર્યક્રમમાં જામનગર દક્ષીણ બેઠકના ધારાસભ્ય દિવ્યેશભાઈ અકબરી, ઉતર બેઠકના ધારાસભ્ય રીવાબા જાડેજાએ સાંસદ અને લોકસભા ઉમેદવાર પૂનમબેન માડમને જંગી બહુમતીથી જીતાડવા માટે અપીલ કરતા જણાવેલ કે, ભારતના સર્વાંગી વિકાસ માટે વડાપ્રધાન મોદીએ જે સપનું સેવ્યું છે, તેને સાકાર કરવા સમગ્ર હાલાર સહિતના જામનગરના મતદાતાઓએ ભારે સંખ્યામાં મતદાન કરીને વડાપ્રધાનના હાથ મજબૂત કરવા જોઈએ.
12 લોકસભાના સાંસદ તથા ઉમેદવાર પૂનમબેન માડમ હસ્તે 78 વિધાનસભા મધ્યસ્થ કાર્યક્રયનું ઉદ્ઘાટન કરવામાં આવેલ પૂનમબેન માડમ આ પ્રસંગે સૌને આવકારેલ તથા ઉદબોધન કરતા જાણવેલ કે, વિકસિત ભારતની કલ્પનાને સાકાર કરવા માટે નરેન્દ્રભાઈ મોદીએ જે સપનું સેવ્યું છે, તેને સાર્થક કરવા માટે લોકશાહીના મહાપર્વ એવા 7 મી મે ના રોજ સમગ્ર હાલારવાસીઓએ બહોળી સંખ્યામાં મતદાન કરીને લોકશાહીના મહાપર્વની ઉજવણી કરવી જોઈએ. વડાપ્રધાન મોદીના નેતૃત્વમાં છેલ્લા દસ વર્ષના શાસનકાળ દરમિયાન હાલારમાં વિકાસના અનેક કામો થયા છે, અને સર્વે યોજનાઓને જનજન સુધી પહોંચાડવામાં પણ જબરી સફળતા મેળવી છે.ઉપરાંત અનેક માળખાકીય સુવિધાઓ ઉભી કરવામાં આવી છે, જેથી સમગ્ર હાલાર સહિતના જામનગર પંથકને પણ અનેક માળખાકીય યોજનાઓથી જોડવા માટે વડાપ્રધાન નરેન્દ્ર મોદી થનગની રહ્યા છે, ત્યારે વડાપ્રધાનના હાથ મજબૂત કરવા અને શ્રેષ્ઠ ભારતનું નિર્માણ કરવાના ભાગરૂપે અવશ્ય મતદાન કરવા અનુરોધ કર્યો હતો.
આ ચૂંટણી ભારત દેશને 2047 માં વિશ્વગુરુ બનાવવાની ચૂંટણી છે, આપણી ભાવિ પેઢીના ભવિષ્યને ઉજ્વળ બનાવવાની ચૂંટણી છે. નરેન્દ્રભાઇ મોદીના નેતૃત્વમાં ભારત દેશ વિશ્વગુરુ બનવાની દિશામાં આગળ વધી રહ્યો છે, જામનગરની જનતાએ જામનગરથી જંગી બહુમતી થી એક કમળને દિલ્લી પહોચાડવું, તેવી અપીલ કરવામાં આવી હતી.
કાર્યક્રમને સંબોધન કરતા શહેર ભાજપ પ્રમુખ વિમલ કગથરાએ જણાવેલ કે, ચૂંટણી એટલે લોકશાહીનું પર્વ, સૌ કોઈ એ આ લોકશાહીના પર્વમાં મતદાન અવશ્ય કરવું જોઈએ, અને આ ચૂંટણીમાં ભારતીય જનતા પાર્ટીને,પૂનમબેન માડમને જંગી બહુમતી થી જીતાડી દિલ્લી મોકલવા જોઈએ. ઉદઘાટન સમારોહ દરમિયાન એકઠી થયેલ જનમેદની જોતા, પૂનમબેન માડમની જંગી બહુમતીથી જીત નિશ્ચિત જણાય આવે તેવો ઉત્સાહજનક માહોલ જોવા મળે છે.
આ કાર્યક્રમમાં ભાજપ શહેર અધ્યક્ષ ડો વિમલભાઈ કગથરા, સાંસદ તથા ઉમેદવાર પૂનમબેન માડમ, મહામંત્રી પ્રકાશભાઈ બામણીયા, વિજયસિંહ જેઠવા, મેરામણભાઇ ભાટુ, જિલ્લા બીજેપી અધ્યક્ષ રમેશભાઇ મુંગરા, ધારાસભ્ય દિવ્યેશભાઈ અકબરી, રીવાબા જાડેજા, લોકસભા સંયોજક ડો વિનોદભાઈ ભડેરી, ૭૯ વિધાનસભા પ્રભારી હિરેન પારેખ, 78 વિધાનસભા સંયોજક ધર્મરાજસિંહ જાડેજા, 78 વિધાનસભા પ્રભારી સુરેશ વશરા, મેયર વિનોદ ખીમસુરીયા, ડે મેયર ક્રિષ્નાબેન સોઢા, શાસકપક્ષ નેતા આશિષ જોશી, સ્ટે. કમિટી ચેરમેન નિલેશ કગથરા, શિક્ષણ સમિતિ ચેરમેન મનીષ કનખરા, પૂર્વ ધારાસભ્ય લાલજીભાઈ સોલંકી, પૂર્વ મંત્રી પરમાનંદભાઈ ખટ્ટર, પૂર્વ પ્રમુખ હસમુખભાઇ હિંડોચા, હિતેનભાઈ ભટ્ટ, અશોક નંદા, મુકેશ દાશાણી, નિલેશ ઉદાણી, પૂર્વ મેયરો અમીબેન પરીખ, બીનાબેન કોઠારી, હસમુખ જેઠવા, અગ્રણી મેરામણભાઇ પરમાર, સામાજિક અગ્રણી તથા જામનગર ડીસ્ટ્રિક કો ઓપરેટીવ બેંકના, ચેરમેન જીતુભાઈ લાલ, સહિત શિક્ષણ સમિતિના સભ્યો, સામાજિક સંસ્થાના હોદેદારો, વિવિધ મોરચાના પદાધિકારીઓ, કોપોરેટરો, કાર્યકર્તાઓ, વોર્ડ સમિતિના પદાધિકારીઓ, પેઇજ સમિતિના પ્રમુખો સહિત વિશાળ સંખ્યામાં કાર્યકર્તાઓ ઉપસ્થિત રહ્યા હતા
