Mysamachar.in-દેવભૂમિ દ્વારકા:
બેટ દ્વારકા એ ચોતરફથી દરીયાઇ વિસ્તાર ધરાવતો ટાપુ છે. ધાર્મિક દ્રષ્ટીએ જોઇએ તો આ સ્થળે ભગવાનશ્રી દ્વારકાધીશનુ નિવાસ સ્થાન પણ આવેલ છે. એટલે આ પ્રદેશ ધાર્મિક આસ્થાના કેન્દ્રની સાથોસાથ પર્યટક સ્થળ તરીકે પણ ખૂબ જ પ્રસિધ્ધ છે.આ સ્થળ ભૂતકાળથી ધાર્મિક તેમજ પર્યટકની દ્રષ્ટિએ પ્રસિધ્ધ હોવાથી સમગ્ર ભારતભરમાંથી મોટી સંખ્યામાં પર્યટકો સહિત અનેક ધાર્મિક આસ્થા ધરાવતા શ્રધ્ધાળુઓ દર્શનાર્થે પધારતા હોય છે. તાજેતરમાં જ વડાપ્રધાન દ્વારા હજારો વર્ષો બાદ જમીનથી જમીનને સાંકળતો ઓખાથી બેટ દ્વારકાને જોડતો અતિમહત્વનો એવો સુદર્શન બ્રીજ તૈયાર કરાવી તેને ખૂલ્લો મુકવામાં આવેલ છે. જેથી હાલની તેમજ ભવિષ્યની દ્રષ્ટિએ આ સ્થળે વિશાળ પ્રમાણમાં દર્શનાર્થીઓ તથા પર્યટકો ઘસારો રહેનાર છે.
સાથો- સાથ આ સ્થળ પાકિસ્તાનથી પણ સૌથી નજીક દરીયાઇ સીમા ધરાવતો પ્રદેશ છે. જેથી સુરક્ષાની દ્રષ્ટિએ પણ આ સ્થળનુ મહાત્મય ખૂબ જ વધારે થઇ ગયેલ છે. આ સમગ્ર પરીસ્થિતિને ધ્યાને લઇ તેની મહત્વતાને ગંભીરતાથી સમજી ગુજરાત રાજયના મુખ્યમંત્રી તથા ગૃહરાજયમંત્રી દ્વારા નિર્ણય લઇ બેટ દ્વારકા ખાતે એક અલગથી ગુજરાત રાજયનુ પ્રથમ એવુ આઇલેન્ડ પોલીસ સ્ટેશન મંજુર કરવામા આવેલ છે. જેનુ દેવભૂમિ દ્વારકા પોલીસ અધિક્ષક નિતેશ પાંડેય તથા અન્ય રાજકીય તથા સ્થાનિક આગેવાનોના વરદ હસ્તે તથા ઉપસ્થિતિમા લોકાર્પણ કરવામાં આવેલ છે.
રાજય સરકારના નિર્ણયને ગંભીરતાથી લઇ રાજકોટ વિભાગના પોલીસ મહાનિરીક્ષક અશોકકુમાર યાદવના માર્ગદર્શન હેઠળ દેવભૂમિ દ્વારકા જિલ્લાના પોલીસ અધિક્ષક નિતેશ પાંડેય દ્વારા આ અધતન સુવિધા ધરાવતા પોલીસ સ્ટેશનમાં બેટ દ્વારકા ખાતે પધારતા શ્રધ્ધાળુઓ તેમજ પર્યટકોને કોઇ યાતના કે મુશ્કેલીનો ભોગ ન બનવુ પડે તેમજ આ વિસ્તારમાં કાયમી રીતે કાયદો અને વ્યવસ્થા જળવાઇ રહે તે હેતુથી બેટ દ્વારકા પોલીસ સ્ટેશનમાં બાયનોકયુલર, ડ્રોન સર્વેલન્સ સીસ્ટમ, સેન્ડ બાઇક (એટીવી), થીડી મેપીંગ જેવી આધુનિક ટેક્નોલોજીની સુવિધા ઉપલબ્ધ કરવામાં આવેલ છે.
જેનાથી આ વિસ્તારમાં સુગમ રીતેની ટ્રાફીક વ્યવસ્થાની જાળવણી, ક્રાઉડ કંટ્રોલ, ડ્રગ્સ ગતિવિધ ઉપર નિયંત્રણ, રાષ્ટ્ર વિરોધી તત્વો ઉપર નિયંત્રણ, ધાર્મિક યાત્રાળુને જરૂરી કાયદાકીય સગવડ, અનિષ્ટ તત્વો ઉપર કંટ્રોલ, વન્ય જીવ સૃષ્ટિનું રક્ષણ તેમજ દરીયાઇ સુરક્ષા જેમાં ખાસ કરીને મંદીર તથા લોકોના જાનમાલની સુરક્ષાની પુરતી સગવડ ઉપલબ્ધ રહેશે. સાથોસાથ સ્થાનિક રહીશો માટે પણ તેઓની સાથે થઇ રહેલ અન્યાય બાબતે તેઓને હવે ઓખા મરીન પોલીસ સ્ટેશન સુધી દુર જવુ નહી પડે અને સ્થાનિક કક્ષાએથી જ તેઓને પુરતો ન્યાય મળી રહેશે. આ રીતે પોલીસ પ્રજા નજીક જઇ તેઓના પ્રશ્નોનું સરળતાથી નિરાકરણ લાવી એક સાચા મિત્ર તરીકે પોતાની ફરજ અદા કરી શકશે.
