Mysamachar.in-ગુજરાત:
ફાઈવ-જી માત્ર બિઝનેસ છે અથવા શહેરી વિસ્તારોમાં ઉપયોગી થશે એવું તમે માનતાં હો તો, તમારી આ માન્યતા ખોટી પડી શકે છે ! ફાઈવ-જી ભારતમાં એક ચમત્કાર પૂરવાર થશે, એ દિવસો દૂર નથી. નિષ્ણાંતો આમ જણાવી રહ્યા છે.તાજેતરમાં વડાપ્રધાને ઈન્ડિયા મોબાઈલ કોન્ગ્રેસમાં ફાઈવ-જી ટેકનોલોજી લોન્ચ કરતાં જ દેશમાં હાઈસ્પીડ ઈન્ટરનેટનો એક નવો અને ક્રાન્તિકારી યુગ શરૂ થઈ ચૂક્યો છે. આ ટેકનોલોજી શહેરી વિસ્તારો ઉપરાંત ગ્રામ્ય અને અંતરિયાળ વિસ્તારોમાં પણ જબરદસ્ત ક્રાંતિકારી પરિવર્તનો લાવવામાં નિમિત્ત બનશે.
દેશનાં અર્થતંત્રમાં મહત્વનો હિસ્સો ધરાવતું ખેતી ક્ષેત્ર આ ટેકનોલોજીથી સ્માર્ટ બની જશે. પાકોમાં જીવાત નિયંત્રણ વ્યવસ્થા અનોખી બની જશે. સૂક્ષ્મ તથા મોટી જીવાતોના ફોટા નિષ્ણાંતો સુધી ગણતરીની મિનિટોમાં પહોંચી જશે. જીવાતની ઓળખ થશે. તેનાં નિયંત્રણ માટેનાં સચોટ ઉપાયો જાહેર થશે. જેથી ખેત ઉત્પાદન અને ખેડૂતોની આવકમાં વધારો થશે. એજ રીતે, વાઈફાઈથી એક ડગલું આગળ જે ક્ષેત્રોમાં ઓપ્ટિકલ ફાઇબર કેબલ પહોંચ્યા છે ત્યાં ફાઈવ-જી ટેકનોલોજી પહોંચી જશે. આ ટેકનોલોજી લાઈ-ફાઈ છે, જે લાઈટના બીમ (શેરડો) પર આધારિત છે. ઓએફસી નાં એક છેડાં પર લાઈટનુ બીમ પહોંચાડી ગણતરીની મિનિટોમાં અન્ય છેડાં પર તે લાઈટ બીમને રિસિવ કરી શકાશે.
ધારોકે આ બીમને 10 કિમી દૂર પહોંચાડવું છે તો આ બીમ મારફત આપણે તેને એક જ સેકન્ડમાં પહોંચાડી શકીશું અને પ્રતિ સેકન્ડ 1 જીબી ડેટા ટ્રાન્સફર કરી શકાશે. હાલમાં આસામનાં ગૌહાટી, લડાખ અને ભાવનગર જિલ્લામાં ધરોઈ ડેમ ખાતે આ ટેકનોલોજી આધારિત ડીવાઈસ સફળતાપૂર્વક કામ કરી રહ્યા હોવાનો આ ક્ષેત્રમાં કામ કરતી એક કંપનીએ દાવો કર્યો છે.આ ઉપરાંત અન્ય એક કંપનીએ સ્માર્ટ ખેતી માટે એક મોડેલ તૈયાર કર્યું છે જેનાં વડે છોડ અને માટીનાં ક્વોલિટી નિભાવ અને જાળવણી કરી શકાશે. આ ટેકનોલોજીમાં કેમેરા અને સેન્સરનો વ્યાપક ઉપયોગ કરવામાં આવશે. હાલમાં કેરળનાં કોચિ ખાતે આ મોડેલ કાર્યરત છે. અંદાજે પાંચ લાખ ખેડૂતો હાલમાં આ મોડેલની મદદથી સ્માર્ટ ખેતી કરી રહ્યા છે, એવો દાવો એક ટેલિકોમ કંપની એ કર્યો છે.
આગામી દિવસોમાં વ્યવહારૂ રીતે આ ટેકનોલોજીનાં ઉપયોગમાં શું શું તકલીફો અથવા પ્રશ્નો ઉભા થાય છે અથવા આ પરિવર્તનો કેટલાં પ્રમાણમાં વ્યવહારૂ અને ઉપયોગી પૂરવાર થાય છે – તે સમય કહેશે. કેમ કે, ફોર-જી લોન્ચ વખતે પણ પ્રશંસા ઘણી થયેલી પરંતુ આપણાં કંગાળ ઈન્ફ્રાસ્ટ્રક્ચર આપણને ટેકનોલોજીનાં પારાવાર લાભોથી વંચિત રાખતું હોય છે. સરકારી કચેરીઓમાં સર્વર ડાઉન જેવાં રોગોથી આપણે દાયકાઓથી પિડાઈ રહ્યા છીએ, એ પણ ધ્યાનમાં રાખીએ.
