Mysamachar.in-દેવભૂમિ દ્વારકા:
દેવભૂમિ દ્વારકા જિલ્લામાં છેલ્લા કેટલાક સમયથી માન્યતા પ્રાપ્ત ડિગ્રી વગર ડોક્ટર બની બેઠેલા શખ્સો દ્વારા લોકોના જીવ અને શારીરિક સલામતી જોખમમાં મૂકીને કરવામાં આવતી તબીબી પ્રેક્ટિસ સામે જિલ્લા પોલીસ વડા જયરાજસિંહ વાળાની સૂચના મુજબ જુદી જુદી પોલીસ ટીમ દ્વારા અવિરત રીતે કડક કાર્યવાહી કરવામાં આવી રહી છે. જેમાં ખંભાળિયા તાલુકામાં ગુરુવારે બે શખ્સો સામે કરવામાં આવેલી કાર્યવાહી બાદ ગઈકાલે શુક્રવારે પણ પોલીસ કાર્યવાહીમાં વધુ છ આસામીઓને ઝડપી લઇ, ધોરણસરની કાર્યવાહી કરાઈ હતી.
પોલીસ દ્વારા જાહેર કરવામાં આવેલી વિગત મુજબ ખંભાળિયામાં રામનાથ સોસાયટી વિસ્તારમાં રહેતા અને બી.એ.એમ.એસ.ની ડિગ્રી ધરાવી અને અત્રેથી આશરે 20 કિલોમીટર દૂર ભાણખોખરી ગામે તબીબી પ્રેક્ટિસ કરતા પરબત સાજણ ગોજીયા (ઉ.વ. 40) ઉપરાંત આ જ ગામેથી ધતુરીયા ગામના અરસી વીરા ભોચીયા (ઉ.વ. 28), ખંભાળિયા તાલુકાના વાડીનાર ગામેથી મૂળ કોલકત્તા રાજ્યના નદીયા જિલ્લાના વતની અને હાલ મોટા આંબલા ગામે રહેતા સુબ્રત ગૌર વિશ્વાસ (ઉ.વ. 40), દ્વારકાના ફૂલવાડી વિસ્તારમાંથી આમીન ઈબ્રાહીમ જેઠવા (ઉ.વ. 38), ઓખાના પોસીત્રા વિસ્તારમાંથી અખ્તર ગફાર જેઠવા (ઉ.વ. 40) અને ભાણવડના હાથલા ગામેથી રમેશ મનસુખલાલ કુબાવત (ઉ.વ. 77) નામના કુલ છ સામે બી.એન.એસ. અને મેડિકલ પ્રેક્ટિશનર એક્ટની કલમ હેઠળ સ્થાનિક પોલીસ મથકમાં ગુનો નોંધવામાં આવ્યો છે.મહત્વનું છે કે આવા ઘોડા ડોકટરોને ઝડપી પાડવાની કાર્યવાહી આરોગ્ય વિભાગે કરવાની હોય છે પણ ના તો જામનગર કે દેવભૂમિ દ્વારકા જીલ્લામાં આરોગ્ય વિભાગને બદલે આ કાર્યવાહી પોલીસ વિભાગ કરતો હોવાનું સમયાંતરે સામે આવતું રહે છે.
