Mysamachar.in-કચ્છ:
રાજ્યમાં દિનપ્રતિદિન ધોરીમાર્ગો પર અકસ્માતોની સંખ્યામાં સતત વધારો થઇ રહ્યો છે, ત્યારે આજે વધુ એક ગમખ્વાર અકસ્માતની ઘટના કચ્છ જીલ્લામાં સામે આવી જ્યાં ત્રણ લોકોને જીવ ગુમાવવાનો વારો આવ્યો છે તો આ ઘટનામાં 10થી વધુ લોકો ઘાયલ થયા હોય તેની સારવાર ચાલી રહી છે.
સુરજબારી-સામખીયાળી હાઇવે પર નવા અને જૂના કટારીયા પાટીયા વચ્ચેના માર્ગે આજે બુધવાર બપોરે ગમખ્વાર અકસ્માતની ઘટના સર્જાઈ છે. માતાના મઢના યાત્રિકોના ટ્રેક્ટરને પાછળથી પુરઝડપે જતી ટ્રકની ટક્કર લાગતા ટ્રોલીમાં સવાર 10થી વધું વ્યક્તિઓ ફૂટબોલની જેમ હવામાં ફંગોળાયા હતા. આ અકસ્માતમાં બે વ્યક્તિના ઘટનાસ્થળે જ કરુણ મોત નિપજયા હતા, જ્યારે એક વ્યક્તિનું હોસ્પિટલમાં સારવાર મળે તે પહેલા જ મૃત્યુ નિપજ્યું હતું.તો ઘટનામાં 10 થી વધુ લોકો ઘાયલ હોવાની માહિતી સામે આવી રહી છે. આ ગમખ્વાર અકસ્માતનો ભોગ બનનાર મોરબી જીલ્લાના રહેવાસીઓ હોવાનું અને માતાના મઢ જઈ રહેલા શ્રદ્ધાળુઓ હોવાનું સામે આવ્યું છે.
