Mysamachar.in-દેવભૂમિ દ્વારકા:
ભારતના ચૂંટણી પંચ દ્વારા ગતરોજ ગુજરાત રાજ્યની વિધાનસભાની સામાન્ય ચૂંટણીની જાહેરાત કરવામાં આવી છે. દેવભૂમિ દ્વારકા જિલ્લામાં 81 – ખંભાળિયા વિધાનસભા મતદાર વિભાગ અને 82 – દ્વારકા વિધાનસભા મતદાર વિભાગનો સમાવેશ થાય છે. આગામી વિધાસભા સામાન્ય ચુંટણી અંતર્ગત મુક્ત, ન્યાયી અને નિષ્પક્ષ ચૂંટણી યોજવાનું આયોજન કરવામાં આવ્યું છે. તેમ જિલ્લા ચુંટણી અધિકારી અને જિલ્લા કલેકટર એમ.એ. પંડ્યાના અધ્યક્ષ સ્થાને યોજાયેલી પત્રકાર પરિષદમાં તેમણે જણાવ્યું હતું.
જિલ્લાના મુખ્ય ચુંટણી અધિકારીએ વિગતો આપતા જણાવ્યું કે, દેવભૂમિ દ્વારકા જિલ્લામાં પ્રથમ ફેઝમાં એટલે કે તા. 1 ડિસેમ્બરના રોજ મતદાન થશે. તા. 10 ઓક્ટોબર અંતિત મતદારોમાં જિલ્લામાં કુલ 5,94,216 મતદારો નોંધાયા છે. જેમાં 17,507 યુવા મતદારો છે. અને 80 વર્ષથી વધુના 12,783 મતદારો નોંધાયા છે.
મતદાન મથકો અંગેની વિગતો આપતા તેમણે જણાવ્યું કે, જિલ્લામાં કુલ 652 મતદાન મથકો છે. સખી મતદાન મથકોની સંખ્યા 14, પી.ડબલ્યુ.ડી. દ્વારા સંચાલિત મતદાન મથકોની સંખ્યા 2, આદર્શ મતદાન મથકોની સંખ્યા 2, યુવા દ્વારા સંચાલિત મતદાન મથકોની સંખ્યા 1 અને ઈકો ફ્રેન્ડલી મતદાન મથકોની સંખ્યા 2 છે. આ ઉપરાંત ચૂંટણી પંચની સૂચના મુજબ 652 મતદાન મથકો પૈકી 328 મતદાન મથકો ખાતે વેબકાસ્ટિંગ સુવિધા ઉપલબ્ધ કરવામાં આવશે. અને મતદાનના દિવસે મતદાન મથકની કામગીરીનું લાઈવ વેબકાસ્ટિંગ કરવામાં આવશે.જિલ્લામાં દરેક મતદાન મથકો ખાતે મતદારોને જરૂરી માહિતી પૂરી પાડવા માટે વોટર આસિસ્ટન્સ બુથ ઊભા કરી, આ બુથ પર બીએલઓની નિમણુક કરી મતદારોને સુવિધા પૂરી પાડવામાં આવશે.
જિલ્લામાં આદર્શ આંચારસંહિતાના અમલીકરણ માટે નોડલ ઓફિસરની પણ નિમણુક કરવામાં આવી છે. આગામી મતદાનના દિવસે તમામ મતદારો મતદાન કરે તે માટે અપીલ પણ કરવામાં આવી હતી.આ મીટીંગમાં જિલ્લા વિકાસ અધિકારી એસ.ડી. ધાનાણી, જિલ્લા પોલીસ વડા નીતેશ પાંડેય, નિવાસી અધિક કલેક્ટર ભૂપેશ જોટાણીયા, ડી.આર.ડી.એ. નિયામક જે.આર. પરમાર, નાયબ જિલ્લા ચૂંટણી અધિકારી આસ્થા ડાંગર, પ્રાંત અધિકારી પાર્થ કોટડીયા ઉપસ્થિત રહ્યા હતા.
