Mysamachar.in-જામનગર:
જામનગર સહિત સમગ્ર રાજ્યમાં દેશી દારૂ અને અંગ્રેજી શરાબની રેલમછેલથી કોઈ અજાણ નથી. દારૂબંધી હોવાથી આવી બાબતો અવારનવાર ચર્ચાસ્પદ અથવા વિવાદાસ્પદ બનતી હોય છે. આવો વધુ એક કિસ્સો શહેરમાં બનવા પામ્યો છે. જેમાં જાહેર માર્ગ પર દારૂ રેલાતાં લોકોને જોણું થયું હતું.
જામનગરના ખોડિયાર કોલોની વિસ્તારમાંથી એક એક્ટિવા પસાર થઈ રહ્યું હતું. કોઈ કારણસર આ વાહન સ્લીપ થયું. ચાલક તથા વાહન પડ્યા અને ઢસડાયા. વાહનની ડીકીમાં દેશી દારૂ હતો. આ દારૂની જાહેર માર્ગ પર રેલમછેલ થઈ. આસપાસના લોકોએ આ ખેલની મજા લીધી. બાદમાં પોલીસે આ શખ્સની અટકાયત કરી. જો કે, આ શખ્સનું નામ હજુ સુધી જાહેર થયું નથી. પીએસઆઈના જણાવ્યા અનુસાર, મામલો ડી સ્ટાફ હસ્તક છે. અત્રે ઉલ્લેખનિય છે કે, જામનગર શહેરમાં દેશી દારૂની ભઠ્ઠીઓનો તોટો નથી. અને, શહેરની આસપાસના ગ્રામ્ય વિસ્તારોમાં બનતો દેશી દારૂ જુદી જુદી રીતે જામનગર શહેરમાં પ્યાસીઓ સુધી પહોંચતો હોવાની વાતની પણ કોઈને નવાઈ નથી.
