Mysamachar.in: જામનગર,દેવભૂમિ દ્વારકા
સમગ્ર રાજ્યમાં ફરી એકવાર કેસરીયા વંટોળમાં વિપક્ષ કોંગ્રેસનું ઘર તહસનહસ થયું છે. ક્યાંક ‘આપ’ નો ઉદય થયો છે, ક્યાંક ગત્ ચૂંટણીઓની સરખામણીએ કોંગ્રેસનો દેખાવ સુધર્યો પરંતુ એકંદરે ભાજપાનું બુલડોઝર વિજયી થયું. હાલારમાં પણ સલાયાને બાદ કરતાં ભાજપાનો જયજયકાર થયો, જો કે સલાયામાં ભાજપા ભૂંસાયું અને ભાણવડ કોંગ્રેસ પાસેથી આંચકી લેવામાં ભાજપા સફળ રહ્યું. જામનગર જિલ્લામાં કોંગ્રેસનું કાસળ નીકળી ગયું.દ્વારકા યાત્રાધામમાં કેસરી બુલડોઝર નીચે વિપક્ષ ચગદાઈ ગયો.
આજે મંગળવારે સવારે મતગણતરી ચાલુ થઈ ત્યારથી હાલારમાં ભાજપાતરફી વાતાવરણ રહ્યું. ભરાણા અને સલાયાને બાદ કરતાં ભાજપાને સર્વત્ર સફળતા સાંપડી. સલાયાને બાદ કરતાં પાંચેય પાલિકાઓ ભાજપાના કબજામાં. ખંભાળિયા તાલુકાની ભરાણા પંચાયત બેઠક પર કોંગ્રેસના ઉમેદવાર ચૂંટાયેલા જાહેર થયા.
જામનગર જિલ્લાની ધ્રોલ પાલિકામાં કોંગ્રેસનો દેખાવ સુધારા તરફી રહ્યો પણ સતા તો ભાજપા પાસે જ રહી. અહીં એક ઉમેદવારનું અવસાન થતાં 4 બેઠકોની ચૂંટણીઓ હવે આવતાં મહિને થશે. છ વોર્ડની બાકીની 24 બેઠક પૈકી ભાજપાને 15, કોંગ્રેસને 8 અને 1 બેઠક અપક્ષને મળી. ગત્ ટર્મમાં કોંગ્રેસની માત્ર 4 બેઠક હતી. ભાજપાએ તાકાતમાં ઘટાડો અનુભવવો પડ્યો.
જામજોધપુર પાલિકામાં 28 બેઠક પૈકી 27 બેઠકમાં, વિપક્ષના ધારાસભ્ય છતાં, ભાજપાનો વિજયવાવટો ફરકયો. આમ આદમી પાર્ટીને એકમાત્ર બેઠક વોર્ડ નંબર સાતમાં મળી. એ જ રીતે, કાલાવડ પાલિકામાં પણ ભાજપાનો જયજયકાર 28 પૈકી 26 બેઠક પર થયો, વિપક્ષ કોંગ્રેસને માત્ર 2 બેઠક. જામવંથલીની તાલુકા પંચાયત બેઠક તથા જોડિયાની તાલુકા પંચાયત બેઠક પણ ભાજપાનાં ખાતામાં. જોડિયા બેઠક બિનહરીફ મળી હતી.
દ્વારકા જિલ્લાની 3 પૈકી 2 પાલિકાઓ ભાજપાના કબજામાં, એમાંયે દ્વારકા યાત્રાધામમાં તો ક્લીન સ્વીપ. જો કે સલાયામાં ભાજપા ભૂંસાઈ ગયું. આમ આદમી પાર્ટી સાથેની ટક્કરમાં કોંગ્રેસે પાલિકા પર કબજો જમાવી દીધો.
દેવભૂમિ દ્વારકા જિલ્લામાં પાલિકા તેમજ પંચાયતની પેટા ચૂંટણીની મતગણતરીમાં ભાજપનો હાથ ઉપર રહ્યો. દ્વારકામાં તમામ 28 બેઠક પર કેસરિયો લહેરાયો. જો કે સલાયા પાલિકામાં ભાજપના ધબડકો: “આપ”નો સિતારો ચમક્યો અને સતા કોંગ્રેસ પાસે રહી. તાલુકા પંચાયતની બે બેઠકમાં ભાજપ કોંગ્રેસની 50- 50 થઈ. દેવભૂમિ દ્વારકા જિલ્લામાં રવિવારે યોજાઈ ગયેલી ત્રણ નગરપાલિકા તેમજ બે તાલુકા પંચાયતની બેઠકની પેટા ચૂંટણી સહિત પાંચ સ્થાનિક સ્વરાજ્યની ચૂંટણીના પરિણામો માટે આજે સવારથી મતગણતરીનો પ્રારંભ થયો હતો. સ્થાનિક કક્ષાએ સવારથી શરૂ કરવામાં આવેલી મત ગણતરીમાં ભારે ઉત્તેજનાસભર માહોલ સર્જી દીધો છે. ત્યારે સલાયા નગરપાલિકામાં મત ગણતરીના પ્રારંભે આમ આદમી પાર્ટીનું વર્ચસ્વ જોવા મળી રહ્યું હતું. જ્યારે દ્વારકામાં ભાજપનો હાથ ઉપર જોવા મળ્યો હતો. અને તમામ બેઠકો ભાજપને ફાળે ગઈ છે. ખંભાળિયા તાલુકાની ભરાણા તાલુકા પંચાયતની બેઠક પર કોંગ્રેસનો અને કલ્યાણપુર તાલુકાની જુવાનપુર પેટા ચૂંટણીમાં ભાજપનો વિજય જાહેર થયો છે. ભાણવડ નગરપાલિકામાં પણ ભાજપનો દબદબો રહ્યો છે.
દેવભૂમિ દ્વારકા જિલ્લાની ખંભાળિયા તાલુકાની સલાયા તેમજ ભાણવડ અને દ્વારકા નગરપાલિકાની યોજાઈ ગયેલી ચૂંટણીમાં આજે સવારથી મતગણતરીની કાર્યવાહી શાંતિપૂર્ણ રીતે શરૂ થઈ હતી. સલાયા નગરપાલિકાની ચૂંટણીની મત ગણતરી ખંભાળિયાની પ્રાંત કચેરી ખાતે શરૂ કરવામાં આવી હતી. જેમાં પ્રથમ ચરણમાં પહેલા વોર્ડની તમામ ચાર બેઠકો પર આમ આદમી પાર્ટીના ઉમેદવાર વિજેતા જાહેર થતાં ભાજપ માટે એકમાત્ર આશાના કિરણ સમાન વોર્ડ નંબર 1 માં ભાજપનો ધબડકો જોવા મળ્યો હતો. આ જ પરિસ્થિતિ વોર્ડ નંબર 2 માં જારી રહી હતી અને તમામ ચાર બેઠકો પર “આપ”નો સકંજો રહ્યો હતો. જ્યારે વોર્ડ નંબર 3 માં પણ આપની આખી પેનલ વિજેતા થયા બાદ વોર્ડ નંબર 4 માં કોંગ્રેસનું ખાતું ખોલ્યું હતું અને એક બેઠક આમ આદમી પાર્ટીને અને ત્રણ બેઠક કોંગ્રેસને મળી છે. વોર્ડ નંબર 5 અને વોર્ડ નંબર 6 માં પણ માં પણ કોંગ્રેસના તમામ ચાર ઉમેદવારો વિજેતા થયા છે.
આ વચ્ચે ઉલ્લેખનીય છે કે સલાયા નગરપાલિકામાં ભાજપ માટે પ્રારંભથી જ આ ચૂંટણી કપરા ચઢાણ રૂપ સાબિત થઈ હતી. જ્યારે અહીંના ચોપાંખિયા જંગમાં ભાજપ જાણે હરીફાઈમાં જ ન હોય તેવું ચિત્ર જોવા મળતું હતું. જ્યારે કોંગ્રેસના પ્રભુત્વ વાળી સલાયા નગરપાલિકામાં કોંગ્રેસના દેખાવ પણ પ્રારંભે નબળો જોવા મળ્યો હતો. જેણે બાદમાં સ્પીડ પકડી હતી અને આખરે સતા જાળવી રાખી. કોંગ્રેસને 15 અને ‘આપ’ ને 13 બેઠક મળી.
ખંભાળિયા તાલુકા પંચાયતની ભરાણા બેઠક પર કોંગ્રેસના ઉમેદવાર ઈસ્માઈલ હાજી ચમડિયા એ 1561 મત મેળવતા તેમને 610 માટે વિજેતા જાહેર કરવામાં આવ્યા હતા.
જ્યારે કલ્યાણપુર તાલુકાના જુવાનપર તાલુકા પંચાયતની પેટા ચૂંટણીમાં ભાજપના ઉમેદવાર 210 મતથી વિજેતા થયા હોવાનું પણ જાણવા મળ્યું છે.
છેલ્લા આશરે અઢી દાયકાથી ભાજપનું શાસન ધરાવતી દ્વારકા નગરપાલિકામાં આ વખતે ચૂંટણી પૂર્વે 28 પૈકી 9 બેઠક બિનહરીફ થઈ ચૂકી છે. ત્યારે આજરોજ હાથ ધરવામાં આવેલી મત ગણતરીના પ્રારંભથી જ ભાજપના તમામ ઉમેદવારો વિજેતા જાહેર થયા હતા.
આમ, દ્વારકા જિલ્લાની દ્વારકા નગરપાલિકા પર વધુ એક વખત ભગવો લહેરાયો છે અને 28 બેઠકોમાંથી અગાઉ નવ બેઠકો ભાજપે બિનહરીફ કબજે કરી હતી. તે પછી બાકીની 19 બેઠકો માટેની ચૂંટણી થતા વોર્ડ નંબર 1 થી 7 સુધીની તમામ 19 બેઠકો ભાજપે જીતી અને 28 માંથી 28 બેઠકો જીતવાનો રેકોર્ડ સર્જ્યો છે.
અહીં આમ આદમી પાર્ટી, કોંગ્રેસ કે અપક્ષનું ક્યાંય પણ ખાતું ખુલ્યું નથી. અગાઉની પાંચ વર્ષ પહેલાની ચૂંટણીમાં 2019 માં ભાજપ દ્વારા 28 માંથી 25 બેઠકો જીતવામાં આવી હતી. અને ત્રણ બેઠકો અપક્ષને ફાળે ગઈ હતી. ત્યારે આ વખતે 28 માંથી 28 બેઠકો જીતી અને ભાજપના દ્વારકાના ધારાસભ્ય માણેક તથા રાજ્યમંત્રી મુળુભાઈ બેરા તથા સાંસદ પૂનમબેન માડમના પ્રયત્નો સફળ થયા છે.
દ્વારકા નગરપાલિકાની ચૂંટણી પ્રક્રિયા એન.ડી.એચ. હાઇસ્કુલ ખાતે હાથ ધરવામાં આવી હતી.
આ સાથે રસાકસી ભરી ભાણવડ નગરપાલિકાની ચૂંટણીમાં મતગણતરી પ્રક્રિયા વિનયન કોલેજ ખાતે કરવામાં આવી હતી જેમાં વોર્ડ નંબર એકમાં ત્રણ બેઠક ભાજપને અને એક બેઠક કોંગ્રેસને સાપડી છે. આ જ રીતે વોર્ડ નંબર 3 માં ભાજપના ત્રણ અને કોંગ્રેસના એક ઉમેદવાર વિજેતા થયા છે.
ભાણવડ નગરપાલિકા પણ ભાજપે કબજે કરી ભગવો લહેરાયો છે. અહીં 24 માંથી આઠ બેઠક અગાઉથી જ ભાજપને બિનહરીફ મળેલી હતી. જ્યારે બાકીની 16 બેઠકો પર રવિવારે ચૂંટણી થઈ હતી. જેમાં કુલ 24 માંથી 21 બેઠકો ભાજપને મળી છે અને ત્રણ કોંગ્રેસને મળી છે. જેમાં ચૂંટણીઓ થઈ તેમાં ત્રણ બેઠકો કોંગ્રેસને મળી છે. ગત વખતે ભાણવડ નગરપાલિકામાં કોંગ્રેસનું શાસન હતું. તેમાંથી ભાજપે તોતિંગ બહુમતી સાથે 24 માંથી 21 બેઠકો કબજે કરી અને સત્તા હાંસલ કરી છે.
