Mysamachar.in-જામનગર:
પશુઓમાંથી માણસમાં ફેલાતા કોંગો ફીવર નામના રોગનો એક કેસ જામનગર શહેરમાં નોંધાતા અને આ દર્દીનું મૃત્યુ થતાં શહેર જિલ્લાના આરોગ્ય સત્તાવાળાઓ એલર્ટ થયા છે. જો કે વર્ષો બાદ શહેરમાં આ કેસ નોંધાયો અને આ કોઈ ચેપી કે વાયરલ રોગ ન હોય, ચિંતાનું કોઇ કારણ નથી. હોસ્પિટલ સત્તાવાળાઓએ આ જાણકારીને સમર્થન આપ્યું છે.
જામનગર શહેરના પંચેશ્વર ટાવર નજીકના એક વિસ્તારમાં રહેતાં 50 વર્ષના એક આધેડ ગત 21 જાન્યુઆરીએ જામનગર જીજી હોસ્પીટલમાં દાખલ થયા હતા, જેમને કોંગો ફીવરના શંકાસ્પદ લક્ષણો હતા એવી જાણકારીઓ ધ્યાન પર આવ્યા બાદ હોસ્પિટલ સત્તાવાળાઓ દ્વારા આ દર્દીનો એક રિપોર્ટ પુણે ખાતે કરાવવામાં આવ્યો હતો. આ રિપોર્ટ જણાવે છે કે, આ દર્દીને કોંગો ફીવર રોગ લાગુ પડ્યો હતો. આ રિપોર્ટ પોઝિટીવ આવ્યો એ અગાઉ ગઈકાલે આ દર્દીનું મોત થયું છે. અત્રે ઉલ્લેખનિય છે કે, જામનગરમાં આજથી આશરે પાંચ વર્ષ અગાઉ કોંગો ફીવરનો કેસ નોંધાયેલો, પાંચ વર્ષ બાદ ફરી આ રોગે જામનગરમાં દેખા દીધી છે.તેવી માહિતી જામનગર મેડીકલ કોલેજના એડીશનલ ડીન ડો.એસ.એસ.ચેટરજીએ આપી હતી.
કોંગો ફીવર રોગ અંગે આ પણ જાણો…
આ રોગ પશુમાંથી માણસમાં પ્રવેશે છે. પશુના શરીર પરની ઈતરડી મારફતે હનીમોરલ નામનો આ પરજીવી રોગનો વાહક બને છે. ગાય તથા ભેંસના પૂંછડામાં આ ઈતરડી જોવા મળતી હોય, આ રોગ પશુપાલકોમાં ખાસ કરીને જોવા મળે છે. આ રોગમાં તાવ આવે, માંસપેશીમાં દર્દ થાય, ચક્કર, માથા તથા પીઠનું દર્દ, આંખોમાં બળતરા અને ગળું બેસી જવું વગેરે લક્ષણો દર્દીમાં જોવા મળતા હોય છે.(પ્રતીકાત્મક તસ્વીર)
