ઝડપાઈ એવી ગેંગ જે કોઈનું પણ ધ્યાન ભટકાવી અને આપતી હતી ચોરીને અંજામ

Mysamachar.in-અમદાવાદ

એક ગેંગ અમદાવાદ ક્રાઈમ બ્રાંચને હાથ લાગી છે, જે ગેન્ગના સભ્યો કોઈપણ વ્યક્તિની નજર ચૂકવીને ચોરી કરવાની મોડસ ઓપરેન્ડી ધરાવે છે, આ ગેંગ કોઈ પણ કાર પાર્ક કરેલી હોય તેની તેની આજુબાજુ રેકી કરતા હતા અને કારનો કાચ તોડી તેમાંથી સમાનની ચોરી કરી લેતા હતા. સાથે-સાથ ગાડી આગળ ઓઇલ ઢોળીને કાર ચાલકને કહેતા હતા કે તમારા ગાડીમાંથી ઓઈલ ટપકે છે. આવું કહીને ગાડીના ડ્રાઇવરની નજર ચૂકવીને ચોરી કરી લેતા હતા. અમદાવાદ ક્રાઈમ બ્રાંચે આંતર રાજ્ય ચોરી કરતા ગેંગના ચાર શખ્સોને ઝડપી પાડ્યા છે. આ સાથે જ 50થી વધુ ગુનાઓનો ભેદ પણ ઉકેલી નાખ્યો છે. આ ગેંગ ગુજરાતના અલગ-અલગ જિલ્લાઓમાં ચોરી કરતા હોવાનું સામે આવ્યું છે. ગેંગમાં સામેલ શંકર નાયડુ, નાગરાજ નાયડુ, સંતોષ નાયડુ અને દિનેશ નાયડુ સામેલ છે.

આ તમામ લોકો મહારાષ્ટ્રના નંદુરબારના રહેવાસી છે. ચારેય શખ્સોને કાલુપુર રેલવે સ્ટેશનની સામેથી પકડી લેવામાં આવ્યા હતા. તેમની પાસેથી ચોરી કરવાના સાધનો અને મુદ્દામાલ પણ કબજે કરવામાં આવ્યો છે. આ ગેંગને નાયડુ અને તૈલી ગેંગ તરીકે પણ ઓળખવામાં આવે છે. આ ગેંગના તમામ શખ્સો પહેલા પણ પકડાઈ ચુક્યા છે અને ગુનાહિત ઇતિહાસ ધરાવે છે. પોલીસની તપાસમાં આ લોકોએ 41 ગુનાઓની કબૂલાત કરી છે. અલગ અલગ 15 પોલીસ સ્ટેશનમાં આ ગેંગ સામે ગુના દાખલ થયા છે.