Mysamachar.in-જામનગર:દેવભૂમિ દ્વારકા:
રાજ્ય સરકાર વધુ એક વખત જંત્રીદરો ઉંચા લઈ જવા તૈયારીઓ કરી રહી છે. આ માટે સરકારે સૂચિત જંત્રીદરો જાહેર કરેલાં છે જ અને સમગ્ર રાજ્યમાંથી, નાગરિકો તથા બિલ્ડર્સ પાસેથી આ બાબતે વાંધાસૂચન મંગાવેલા છે. વાંધાસૂચન ઓફલાઈન અને ઓનલાઈન આપી શકવા વ્યવસ્થાઓ ગોઠવવામાં આવેલી અને 20 જાન્યુઆરી સુધીમાં સરકારે લોકો પાસેથી વાંધાસૂચન મેળવી પણ લીધાં છે. વાંધાસૂચનમાં લોકોએ ઉહાપોહ મચાવી દીધો છે. સરકારને હજારો અરજીઓ મળી છે. હાલારીઓએ પણ ઘણાં બધાં વાંધાસૂચન મોકલી આપ્યા છે.
અત્રે ઉલ્લેખનિય છે કે, જામનગર શહેર સહિત સમગ્ર રાજ્યમાં શહેરી વિસ્તારોમાં સરકાર પ્રેરિત જંત્રીદરો બહુ ઉંચા રહ્યા હોય સમગ્ર રાજ્યમાં અગાઉ બિલ્ડર્સ તથા નાગરિકોએ વિરોધ વ્યક્ત કરેલો હતો. ત્યારબાદ આ અરજીઓ સરકારે મંગાવી તેમાં જાણવા મળેલ છે કે, ગ્રામ્ય વિસ્તારોમાં પણ સરકાર જંત્રીદર ઉંચા કરી નાંખવા ઈચ્છે છે, આથી લોકોએ ઢગલાબંધ વાંધાસૂચન મોકલી આપ્યા. જામનગર અને દ્વારકા જિલ્લાના ગ્રામ્ય વિસ્તારોના લોકોએ પણ ઘણાં બધાં વાંધાસૂચન સરકારને મોકલ્યા છે.
રાજ્યમાં ગ્રામ્ય વિસ્તારોમાંથી હજારો વાંધાસૂચન સરકારને પ્રાપ્ત થયા. લોકો રાડ પાડી ગયા છે. દેવભૂમિ દ્વારકા જિલ્લામાંથી 2 વાંધાસૂચન એવા મળેલ છે કે, અહીં અમુક વિસ્તારમાં સૂચિત જંત્રીદર ઓછા છે, વધારવા જોઈએ. તેની સામે 41 વાંધાસૂચન એવા છે કે, અહીં જંત્રીદર વધારે જાહેર થયા છે તે ઘટાડવા જોઈએ. જામનગર જિલ્લામાં પણ બે અરજીઓ કહે છે, ફલાણા વિસ્તારમાં જંત્રીદર ઓછા છે, વધારવા જોઈએ અને 116 વાંધાસૂચન એવા છે જેમાં જંત્રીદર વધારે છે, ઘટાડવા જોઈએ એવી માંગ થઇ છે.
