જામનગર શહેર અને જિલ્લામાં વરસાદનો વધુ એક રાઉન્ડ નોંધાયો છે. આ હળવો વરસાદ સમગ્ર જિલ્લામાં લગભગ બધાં જ વિસ્તારોમાં નોંધાયો છે. તમામ તાલુકામથકે પણ હળવાથી માંડીને દોઢ ઇંચ સુધીનો વરસાદ નોંધાયો છે.
આજે સવારે 6 વાગ્યે પૂર્ણ થયેલાં 24 કલાક દરમ્યાન જામનગર શહેરમાં અને ધ્રોલ તાલુકામથકે હળવા છાંટા નોંધાયા. જોડીયા, લાલપુર અને જામજોધપુર તાલુકામથકોએ અડધાં-પોણાં ઈંચ સુધીનો વરસાદ નોંધાયો અને કાલાવડ ટાઉન ખાતે પોણાં બે ઈંચ સુધીનો વરસાદ નોંધાયો છે.
આ ઉપરાંત આ વીતેલા 24 કલાક દરમ્યાન જિલ્લાના લગભગ તમામ ગ્રામ્ય વિસ્તારોમાં ઝરમરથી માંડીને ત્રણ ઈંચ સુધીનો વરસાદ નોંધાયો છે. આજે સવારે 6 વાગ્યે પૂર્ણ થયેલાં 24 કલાક દરમ્યાન જિલ્લામાં સૌથી વધુ વરસાદ જોડીયા તાલુકાના બાલંભા ખાતે 3 ઈંચ નોંધાયો છે. જ્યારે બાલંભા નજીકના પીઠડમાં પોણાં ત્રણ ઈંચ વરસાદ નોંધાયો છે.
આ સાથે જ જામનગરના અલિયાબાડા, કાલાવડના ભલસાણ બેરાજા અને મોટા પાંચ દેવડા, જામજોધપુરના સમાણા, ધ્રાફા અને પરડવા ઉપરાંત લાલપુરના મોટા ખડબા ખાતે એક એક ઈંચ વરસાદ નોંધાયો છે. જિલ્લાના અન્ય કેટલાંક ગ્રામ્ય વિસ્તારોમાં અડધાં ઈંચ જેટલો હળવો વરસાદ નોંધાયો છે.
