તને જામનગર મહાનગરપાલિકામાં નોકરી અપાવી દઈશ: પ્રતિકે કહ્યું

Mysamachar.in-જામનગર:

જામનગર જિલ્લાના લાલપુરની ઉપાસના કરમૂર અને તેનો ભાઈ નોકરીઓ મેળવવાની લાલચે ‘લૂંટાયા’ અને આખરે રાજકોટ પોલીસમાં છેતરપિંડીની ફરિયાદ દાખલ થઈ. છેતરનાર શખ્સ ઉપલેટા તાલુકાનો છે. આ કાંડમાં મોનાલી નામની એક યુવતીની પણ ભૂમિકા છે. આ મામલામાં જામનગર મહાનગરપાલિકાનો પણ ઉલ્લેખ થયો હતો.

લાલપુરની ઉપાસના ડાડુભાઈ કરમૂર(26) અને તેના ભાઈએ રાજકોટની ગાંધીગ્રામ પોલીસને એમ જણાવ્યું છે કે, અમારી સાથે પ્રતિક નામના એક શખ્સે રૂ. 3.08 લાખની છેતરપિંડી કરી છે. આ શખ્સે અમને ભાઈબહેનને નોકરીઓ અપાવી દેવાની લાલચો આપી હતી. આ શખ્સનું નામ પ્રતિક કિરીટભાઈ ડઢાણિયા (રહે. મોટી વાવડી, તા. ઉપલેટા) છે.

પોલીસમાં જાહેર થયેલી વિગત અનુસાર, ઉપાસના કરમૂર છેલ્લા ત્રણ મહિનાથી લાલપુર સામૂહિક આરોગ્ય કેન્દ્રમાં નર્સિંગ સ્ટાફ તરીકે નોકરી કરે છે. અગાઉ તેણી રાજકોટ એક ખાનગી હોસ્પિટલમાં નોકરી કરતી ત્યારે તેણીને એક ફ્રેન્ડ હતી, જેનું નામ મોનાલી સોલંકી. થોડા સમય અગાઉ મોનાલીએ ઉપાસનાને કહ્યું: મારાં ગામનો પ્રતિક મને રાજકોટ મહાનગરપાલિકામાં નોકરી અપાવી દેશે. સાથેસાથે તને પણ નોકરી અપાવી દેશે. આમ કહી મોનાલીએ પ્રતિકનું ઈન્સ્ટાગ્રામ આઈડી ઉપાસનાને આપ્યું.

બાદમાં પ્રતિકે ઉપાસનાને કહ્યું: હું તારી રાજકોટ કોર્પોરેશનમાં નોકરી કરાવી આપીશ. ઉપાસનાએ પોતાના ડોક્યુમેન્ટસ પ્રતિકને મોકલી આપ્યા. આ પછી પ્રતિકે જામનગર કોર્પોરેશનમાં નોકરી કરાવી આપવાનું કહી, ઉપાસના પાસેથી નાણાં લેવાનું શરૂ કરી દીધું. બાદમાં પ્રતિકે ઉપાસનાને રાજકોટ કોર્પોરેશનમાં સ્ટાફ નર્સ તરીકે કરાર આધારિત કર્મચારી તરીકે નોકરી પર હાજર થવા બાબતેનો ઓર્ડર પણ આપી દીધો. બાદમાં પ્રતિકે જામનગર કોર્પોરેશનમાં પણ નોકરીનું થઈ જશે એમ કહી ફરીથી પૈસા લીધાં.

ત્યારબાદ નોકરીનો જૂનો ઓર્ડર ગાંધીનગર જમા કરાવવાનો છે એમ કહી પ્રતિક ઉપાસનાને ગાંધીનગર લઈ ગયો. એમની સાથે મોનાલી પણ ગાંધીનગર ગઈ. બાદમાં જુદી જુદી વાતો કરી પ્રતિક નાણાં ખંખેરતો રહ્યો. ત્યારબાદ, ઉપાસનાના ભાઈને રાજકોટ જેટકોમાં નોકરી અપાવી દેવાની લાલચ આપી. બાદમાં આ બધાં ગાંધીનગર અને વડોદરા જતાં આવતાં હતાં. પ્રતિકે નિમણૂંક અને તાલીમના ઓર્ડર પણ આમને આપેલાં. દરમિયાન, પ્રતિકે આ ભાઈબહેન પાસેથી કુલ રૂ. 3.08 ખંખેરી લીધાં. આટલું બન્યા બાદ પણ આ ભાઈબહેનને નોકરી મળી નહીં, આથી આખરે રાજકોટ પોલીસમાં ફરિયાદ દાખલ કરવામાં આવી. ઉપાસનાએ પોલીસમાં એમ પણ જાહેર કર્યું કે, તેણીએ બહેનપણીઓ પાસેથી ઉછીના નાણાં લઇ પ્રતિકને આપ્યા હતાં.