Mysamachar.in-મહેસાણા
હથિયારને સાચવવું ઘણું જોખમકારક છે, અને જો તેમાં પણ ક્યારેક કોઈ ભૂલ થઈ જાય તો… મહેસાણા જિલ્લા પોલીસ હેડક્વાર્ટરમાં એક ચોંકાવનારી ઘટના સામે આવી છે. મહેસાણા હેડક્વાર્ટરમાં આજે સવારે પીએસઆઇ જે.એલ બોરીચા પોતાની રિવોલ્વર સાફ કરી રહ્યા હતા. રિવોલ્વર સર્વિસ કરીને પોતાના પાઉચમાં મુકવા છતા ગોળી અચાનક છુટી ગઇ હતી. ગોળી છુટ્યા બાદ દિવાલે અથડાઇ હતી અને ત્યાંથી બાઉન્સબેક થઇને સામે ઉભેલા તેમના પત્નીના પગમાં વાગી ગઇ હતી. જેના કારણે તેઓ ગંભીર રીતે ઘાયલ થયા હતા. તત્કાલ તેમને સારવાર માટે મહેસાણા સિવિલ હોસ્પિટલ ખાતે ખસેડવામાં આવ્યા હતા. મહેસાણા સિવિલ હોસ્પિટલ ખાતે પ્રાથમિક સારવાર અપાયા બાદ તેમને ખાનગી હોસ્પિટલમાં ખસેડવામાં આવ્યા હતા. જ્યાં તેમના પગમાં રહેલી ગોળી કાઢીને તેમનું માઇનોર ઓપરેશન પુર્ણ થયા બાદ રજા આપી દેવાઇ હતી.
