Mysamachar.in-સુરત
આમ તો સામાન્ય રીતે યુવકો બાઈક પર જાહેર રસ્તાઓ પર બાઈકના અલગ અલગ સ્ટંટ કરતા જોવા મળતા હોય છે, પણ બારડોલીથી બાઈક સ્ટન્ટના વીડિયો બનાવવા માટે સુરતના ડુમસ રોડ પર આવીને સ્ટન્ટ કરતી યુવતીનો વીડિયો હાલ સોશ્યલ મીડિયામાં વાઇરલ થયો છે. જેમાં છુટા હાથે બાઈક ચલાવવી અને માસ્ક નહીં પહેરવાને લઈને સુરત પોલીસે સંજના ઉર્ફે પ્રિન્સી પ્રસાદ નામની યુવતી વિરુદ્ધ કાયદેસરની કાર્યવાહી સાથે અટકાયત કરી છે,
ડુમસ રોડ પર પણ એક બાઈક પર યુવતી વગર માસ્કે સ્ટન્ટ કરતી હોવાનો વીડીયો વાઈરલ થયો હતો. સુરતના ડુમસ રોડ પર કેટીએમ સ્પોર્ટ્સ બાઇક પર માસ્ક પહેર્યા વગર છુટા હાથે હંકારી સ્ટન્ટ કરતી હતી. વિડીયોમાં લાઇટ કલરનું જીન્સ, ટી-શર્ટ અને રેડ કલરનું જેકેટ પહેરેલી યુવતી માસ્ક પહેર્યા વગર છુટા હાથે બિન્દાસ્તપણે સ્પીડમાં કેટીએમ બાઇક હંકારતા નજરે પડી રહી હતી.
યુવતીનો સ્ટન્ટ કરતો વીડિયો કોઇક શહેરીજને પોલીસ કંટ્રોલ રૂમમાં મોકલાવ્યો હતો. પોલીસ કંટ્રોલ રૂમને મળતા આ વીડિયો ઉમરા પોલીસને આપવામાં આવ્યો હતો. પોલીસે કેટીએમ બાઇકના નં. GJ-22-L-9378ના આધારે તપાસ હાથ ધરી હતી. માલિક મોહમદ બિલાલ રસુલભાઇ ઘાંચી હોવાનું સામે આવતા પોલીસે તેમનો સંપર્ક કર્યો હતો. મોહમદ બિલાલે પોતાની બાઇક ડુમસ રોડ પર વીઆર મોલ ખાતે સંજના ઉર્ફે પ્રિન્સી ચંદ્રકિશોર પ્રસાદને ફોટોગ્રાફી અને રાઇડીંગ માટે આપી હોવાનું જણાવ્યું હતું. જેથી પોલીસે આ યુવતીને શોધી કાઢી હતી.
સંજના ઉર્ફે પ્રિન્સીએ માસ્ક પહેર્યા વિના બાઇક રાઇડીંગ કરવા બદલ એપેડમિક ડિસીઝ એક્ટ અને લોકોની જીંદગી ભયમાં મૂકવા બદલ ગુનો નોંધી અટકાયત કરી છે. જોકે, યુવતીની પૂછપરછ દરમિયાન તે બારડોલીની રહેવાસી અને કોલેજમાં બીકોમના બીજા વર્ષમાં અભ્યાસ કરતી હોવાનું જણાવ્યું હતું. વધુમાં સંજના ઉર્ફે પ્રિન્સીના સોશિયલ મીડિયા પર 3.27 લાખ ફોલોઅર્સ છે. સોશિયલ મીડિયા પર સંજનાએ પાંચથી છ આઇડી બનાવ્યા છે. જે પૈકી એક આઇડીમાં 513 પોસ્ટ અપલોડ કરી છે. આ 513 પોસ્ટ પૈકી 80 ટકાથી વધુ પોસ્ટ કેટીએમ, બુલેટ સહિતના બાઇક પર રાઇડીંગ કરતા વીડિયો, કાર ડ્રાઇવ સહિતના વીડિયો છે.
