Mysamachar.in-સુરત
મહિલા સલામતીની વાતો તો ગુજરાતમાં ખુબ થાય છે, પણ ક્યારેક એવા કિસ્સાઓ સામે આવે છે, જે આવા દાવાઓની હવા કાઢી નાખે છે, એક આવો જ કિસ્સો સુરત શહેરમાં થી સામે આવી રહ્યો છે, જ્યાં શહેરના પાલ વોક-વે ખાતે વોકિંગ કરવા નિકળેલી વિદ્યાર્થિની અને તેના બહેનપણી સામે એકાએક યુવક આવી નગ્ન થઈ ગયો હતો. યુવકે પેન્ટ ઉતારી દેતા હેબતાઈ જઈને બુમાબુમ કરી મુકતા આસપાસના અન્ય લોકો દોડી આવ્યા હતા અને યુવકને ઝડપી પાડ્યો હતો,
જહાંગીરપુરામાં આવેલ કોલેજમાં બીજા વર્ષમાં અભ્યાસ કરતી 19 વર્ષીય વિદ્યાર્થીની તેની માતા અને બહેનપણી સાથે પાલ વોક-વે ખાતે વોકિંગ કરવા માટે નિકળ્યા હતા. દરમિયાન આઠથી સાડા આઠેક વાગ્યાના આરસામાં એકાએક એક યુવક તેમની સામે આવીને ઉભો રહી પેન્ટ કાઢી નગ્ન થઈ ગયો હતો. વિદ્યાર્થિનીએ બુમબામ કરતા વોકિંગમાં આવેલા તેના પરિચીત સહિતના લોકો આવતા યુવક ભાગ્યો હતો. જોકે લોકોએ તેને પકડી પાડ્યો હતો. વિદ્યાર્થિનીના પરીચિત યુવકે કોન્ટ્રોલ રૂમમાં ફોન કરતા પોલીસ દોડી આવી યુવકને અટકમાં લીધો હતો. પોલીસની પૂછપરછમાં યુવકે પોતાનું નામ રીતેશ મિશ્રા હોવાનું જણાવ્યું હતું. પોલીસે આ મામલે વિધિવત ફરિયાદ નોંધી વધુ તપાસ હાથ ધરી છે, પણ દિનદહાડે જાહેરમાં બનેલી આ ઘટનાએ ભારે ચર્ચા જગાવી છે.
