Mysamachar.in-અમદાવાદ
તાજેતરમાં જ અમદાવાદથી રાજકોટ સુધી પાઈલોટીંગ કરી ખુદ અમદાવાદનો એક ASI દારૂની હેરાફેરી કરવામાં રાજકોટ એસઓજીને હાથ ઝડપાયા બાદ પોલીસે મોંઘીદાટ સ્કોચની બોટલોમાં હલકી કક્ષાનો દારુ ભેળવવાનું એક કૌભાંડ અમદાવાદમાં થી ઝડપી પાડ્યો છે, અમદાવાદ પી.સી.બીએ નરોડામાંથી બનાવટી દારૂના કૌભાંડનો પર્દાફાશ કર્યો છે, હંસપુરામાં આવેલ નરોડા સ્માર્ટ સિટી ૨ માં મકાન નંબર એ/૧૦૪ માં બનાવટી દારૂને બ્રાન્ડેડ દારૂની બોટલમાં ભરીને વેચાણ કરવામાં આવતું હોવાની બાતમી પોલીસને મળી હતી. જેથી પોલીસ દ્વારા રેડ કરતાં સ્થળેથી વિદેશી દારૂની બોટલ નંગ ૩, વિદેશી દારૂની ખાલી બોટલ, ઢાંકણ, ઢાંકણ સિલ કરવાનુ મશીન અને વિદેશી દારૂ ભરેલા 2 કેરબા પણ મળી આવ્યા છે.
કૃણાલ શાહ નામનો આરોપી આર્થિક લાભ માટે હલકી ગુણવત્તા વાળો દારૂ મંગાવીને બ્રાન્ડેડ દારૂની બોટલમાં ભરીને તેનું છૂટક વેચાણ કરતો હતો. પોલીસને બાતમી મળતા પોલીસે રેડ કરી હતી. જોકે આરોપી મળી આવ્યો ન હતો. હાલમાં પોલીસે આ સમગ્ર મામલે વધુ તપાસ શરૂ કરીને આરોપીને પકડવા માટેના ચક્રો ગતિમાન કર્યા છે. જોકે, આરોપી પકડાયા બાદ જ હકીકત સામે આવશે કે, આરોપી ક્યાંથી હલકી કક્ષાનો દારૂ લાવતો અને ક્યાંથી ખાલી બ્રાન્ડેડ બોટલો લાવતો હતો અને ક્યાં, કોને કોને અને કેટલા સમય થી વેચાણ કરતો હતો તે તમામ પ્રશ્નનો જવાબ પોલીસની તપાસ બાદ જ સામે આવશે.
