Mysamachar.in:રાજકોટ
આજે વહેલી સવારે મહેસાણા પાસે લકઝરી બસ પલટી જતા 2 લોકોના મોતની ઘટના બાદ અકસ્માતની વધુ એક ઘટના સામે આવી છે, આ અકસ્માત રાજકોટ જામનગર હાઈવે પર બન્યો જે ગમખ્વાર અકસ્માતમાં 4 લોકોની જિંદગી હોમાઈ ગઈ છે, કાર અને ટ્રેક્ટર વચ્ચે થયેલ અકસ્માતમાં કારનો કડુસલો બોલી ગયો તો અકસ્માત કેટલો ગંભીર હશે કે ટ્રેક્ટર ટ્રોલીથી અલગ થઇ ગયું હતું આ અંગે જે વિગતો મળી રહી છે તે મુજબ,
રાજકોટ નજીક પડધરી તાલુકાના તરઘડી ગામ નજીક ઉમિયા ચાના કંપની પાસે રાજકોટ-જામનગર હાઇવે પર આજે વહેલી સવારે ટ્રેકટર અને કાર વચ્ચે અકસ્માત સર્જાતા રાજકોટના બે યુવાન સહિત ચારના મોત નિપજતા અરેરાટી વ્યાપી ગઇ છે. કાર અને ટ્રેકટર વચ્ચે અકસ્માત સર્જાતા કાર ચાલક હિમાંશુ પરમાર રહે. ઠેબા ચોકડી, જામનગર કારમાં ચાલકની બાજુની સીટમાં બેઠેલ અજય જોષી રાજકોટ કારમાં પાછળની સીટમાં બેસેલ અજય છગનભાઇ પરમાર રહે. કાલાવડ રોડ, આંબેડકરનગર, રાજકોટ અને ટ્રેકટર ચાલક ખેડુત કિરીટભાઇ ડોબરીયા રહે. ફતેપરા ગામ તા. પડધરીનું ઘટના સ્થળે જ કમકમાટીભર્યુ મોત નીપજ્યાનું સામે આવ્યું છે.
અકસ્માત એટલો ગંભીર હતો કે કારનો બુકડો બોલી ગયો હતો અને ટ્રેક્ટર ટ્રોલીથી નોખુ પડી ગયું હતું. ટ્રેકટરના વ્હીલ પણ નીકળી ગયા હતા. ખેડુત કિરીટભાઇ ટ્રેકટર નીચે દબાઇ જતા દમ તોડી દીધો હતો. બનાવના પગલે સમગ્ર પંથકમાં અરેરાટી વ્યાપી છે. કાર સવાર ત્રણેય મિત્રો જામનગર જતા હોવાનું જાણવા મળેલ છે.
