Mysmachar.in:દેવભૂમિ દ્વારકા
દેવભૂમિ દ્વારકા જિલ્લામાં છેલ્લા બે દિવસથી ફૂંકાતા ચક્રવતી પવનના કારણે ખંભાળિયા તથા ભાણવડ તાલુકામાં વીજ સપ્લાયને વ્યાપક અસર થવા પામી હતી. ખંભાળિયા અને ભાણવડ તાલુકાના ખાસ કરીને ગ્રામ્ય વિસ્તારો તેમજ હાઈ-વે માર્ગ નજીક આશરે 200થી વધુ વીજ થાંભલાઓ ભારે પવનના કારણે પડી ગયા હોવાનું જાણવા મળ્યું છે. આ અંગે અહીંના કાર્યપાલક ઈજનેરએ જણાવ્યું હતું કે વીજપોલ પડી જતા આ અંગેની કામગીરી માટે અન્ય જિલ્લામાંથી 17 જેટલી ટીમો અહીં આવી ગઈ છે. તેઓને ખંભાળિયા નજીકના આરાધના ધામ ખાતે રાખવામાં આવી છે. પવનના કારણે થાંભલા કે કેબલ તૂટી જાય તો તુરંત રિપેર કરવા માટેની વ્યવસ્થા કરવામાં આવે છે. આ માટે પી.જી.વી.સી.એલ. તંત્ર દ્વારા આગોતરા આયોજનથી જ થાંભલા, વાયર, ફેબ્રિકેશન તેમજ અન્ય જરૂરી સાધનો અહીં પૂરતા પ્રમાણમાં મંગાવાની વ્યવસ્થા કરવામાં આવી છે. જે માટે પીજીવીસીએલની ટીમ સતત કાર્યરત છે.
– ખંભાળિયાના કેશોદ ગામે ભારે પવન તથા વરસાદથી થાંભલા, વૃક્ષો જમીનદોસ્ત –
ખંભાળિયા – પોરબંદર રોડ ઉપર આવેલા તાલુકાના કેશોદ ગામે ગઈકાલે બુધવારે 10 મિનિટ સુધી અતિ ભારે વરસાદ તેમજ વંટોળિયા પવનના કારણે 25 જેટલા સ્થળોએ વીજ થાંભલા તૂટી ગયા હતા. આ ઉપરાંત બે ડઝન થી વધુ ઝાડવાનો સોથ વળી ગયો હતો. આ વિસ્તારમાં વીજવાયરો તેમજ થાંભલા તૂટી પડતા ગામમાં લાંબો સમય અંધારપટ્ટ જેવી પરિસ્થિતિ સર્જાઈ હતી. આ અંગેની જાણ સ્થાનિક આગેવાન મોહનભાઈ મોકરીયા દ્વારા પીજીવીસીએલ તંત્રને કરવામાં આવી હતી.
-અધિક્ષક ઈજનેર પી.પી.પરમારે કહ્યું કે..
આ અંગે પીજીવીસીએલના અધિક્ષક ઈજનેર પી.પી.પરમાર સાથે વાત કરવામાં આવી ત્યારે તેમણે કહ્યું કે આજે બપોરે બે વાગ્યે ફાઈનલ રીપોર્ટ આવ્યા બાદ ચોક્કસ આંકડો કહી શકાય તેમ છે.
