Mysamachar.in:રાજકોટ
આજના બાળકોમાં જીદનું પ્રમાણ વધી રહ્યું છે. ચીડિયાપણું વાળો સ્વભાવ અને તેમાં માતા પિતા જો જીદ પૂરી ના કરે તો આજના બાળકોથી માંડીને યુવાઓ ના ભરવાના પગલા ભરી લે છે અને પોતાની સાથે પરિવારને પણ મુશ્કેલીમાં મુકી દે છે, રાજકોટમાં આવી જ એક ઘટના સામે આવી જે રૂવાળા ઉભા કરી દે તેવી છે. એક 10 વર્ષીય બાળાની જીદ માતાપિતાએ પૂર્ણ ના કરતા તે ઘરેથી ભાગી છુટ્યા બાદ દુષ્કર્મનો શિકાર બની હોવાનું સામે આવ્યું છે.
મળતી માહિતી મુજબ રાજકોટનાં નિર્મલા રોડ વિસ્તારમાંથી ત્રણ દિવસ પૂર્વે 10 વર્ષની બાળા રાતે પોતાના ઘરેથી અચાનક ગુમ થઇ ગઇ હતી. બીજા દિવસે સવારે જ્યારે તે મળી ત્યારે તે દુષ્કર્મનો શિકાર થઇ હોવાનું જાણવા મળ્યું હતું. જે બાદ પરિવારના પગ નીચેથી જમીન સરકી ગઇ હોય તેવી સ્થિતિ થઇ ગઇ હતી. જોકે, આ દીકરીએ જણાવ્યા બાદ સ્થાનિક પોલીસે અપહરણનો ગુનાની ફરિયાદમાં પોક્સો સહિતની કલમ ઉમેરીને નરાધમ ગૌતમ ને ઝડપી પાડી ધરપકડ કરી લીધી છે. 10 વર્ષની આ છોકરીએ મોબાઇલ અને કૂતરું લાવવાની જીદ કરી હતી. જેની જીદ માતાપિતા ન માનતા તે ઘરેથી કહ્યા વગર જતી રહી હતી.અને બાદમાં આ રીતે દુષ્કર્મનો શિકાર બની હતી.
આ છોકરી રાતના અગિયાર વાગ્યાની આસપાસ તેના પિતાનો મોબાઇલ અને ટુ વ્હિલર લઇને જતી રહી હતી. જોકે, પરિવારને આ અંગેની જાણ થતા બધા ચિંતામાં આવી ગયા હતા. પરિવારે ગાંધીગ્રામ પોલીસ સ્ટેશનમાં ફરિયાદ નોંધાવી હતી. બીજા દિવસે સવારે દીકરી તેના માસીનાં ઘરેથી મળી આવી હતી. જેથી પરિવારે તેને પૂછ્યું કે આખી રાત ક્યાં હતી તો તેણે પોતાની આખી વ્યથા સંભળાવતા પરિવારનાં હોંશકોશ ઉડી ગયા હતા. દીકરીએ જણાવ્યુ હતુ કે, તે ઘરેથી નીકળીને કોટેચા ચોક પાસેની કે.કે. હોટલમાં પહોંચી હતી. જ્યાં તેને રૂમ આપવાની ના પાડી દીધી હતી. જેથી તે હોટેલની બહાર નીકળી હતી. આ સમયે તેની પાછળ પાછળ એક શખ્સ આવી પોતે રૂમની વ્યવસ્થા કરી આપશેની તેવી વાત કરી હતી. જેથી દીકરી તે વ્યક્તિની વાતમાં આવી ગઇ હતી.
જે બાદ તે નરાધમ તેને તિલક હોટલમાં લઇ ગયો હતો. જ્યાં તેને દીકરીનો ફાયદો ઉઠાવી બળજબરીથી દુષ્કર્મ આચર્યા હતુ. આ આખી વાત સામે આવતા પરિવારે પોલીસનો સંપર્ક કરીને વાત જણાવી હતી. પોલીસે કોટેચા ચોક પાસેની તિલક હોટલે પહોંચી સીસીટીવી ચેક કર્યા હતા. હોટલનાં સીસીટીવી ફૂટેજમાં બાળા સાથે હોટેલનો જ કર્મચારી હોવાનું જોવા મળ્યું હતું. જેથી તપાસ બાદ જાણવા મળ્યું કે, આ વ્યક્તિ મૂળ જામજોધપુર પંથકનો છે. જે કે.કે. હોટેલના સ્ટાફ ક્વાર્ટરમા રહે છે. જે બાદ કર્મચારી ગૌતમ જગદીશ ચુડાસમાને પોલીસે પકડી પાડ્યો હતો. તેની પૂછપરછમાં તેને દુષ્કર્મ આચર્યાની કબૂલાત કરી લીધી હતી. જે બાદ પોલીસે પોક્સોની કલમનો ઉમેરો કરી ધરપકડ કરી છે.
