Mysamachar.in-અમદાવાદઃ
મેટ્રોસિટીમાં સમાજની આંખ ઉઘાડતો કિસ્સો પ્રકાશમાં આવ્યો છે. અહીં શહેરમાં પીજીમાં રહેતી એક મહિલાએ ચિક્કાર દારૂ ઢિંચી હંગામો મચાવ્યો હતો. અડધી રાતે હોબાળો થતા પીજી સંચાલકે પોલીસને બોલાવી મહિલાની ધરપકડ કરાવી હતી. એટલું જ નહીં મહિલા જે રૂમમાં રહેતી હતી તેમાંથી એક દારૂની બોટલ પણ મળી આવી છે. અમદાવાદ શહેરના પોશ વિસ્તાર એવા વસ્ત્રાપુરમાં નેબ્યુલા ટાવરમાં એક ગર્લ્સ પીજીમાં રાતે 12 વાગ્યાની આસપાસ એક મહિલા દારૂ પીને સાથે રહેતી અન્ય યુવતીઓ સાથે ઝઘડો કરી ધમાલ કરતી હોવાનો મેસેજ પોલીસને મળ્યો હતો. બાદમાં પોલીસે સ્થળ પર પહોંચી મહિલાની ધરપકડ કરી હતી, મહિલાના રૂમમાંથી વિદેશી દારૂની બોટલ મળી આવી હતી. તપાસમાં બહાર આવ્યું કે આ મહિલા મૂળ મહારાષ્ટ્રની છે અને તે અમદાવાદમાં એક કંપનીમાં નોકરી કરે છે. ત્યારે પોલીસે મહિલા સામે બે ગુના દાખલ કરી વધુ તપાસ હાથ ધરી છે. બીજી બાજુ અડધી રાતે કોઇ મહિલા દ્વારા દારૂ પીને હોબાળો કરવાની ઘટનાએ આસપાસના વિસ્તાર તથા શહેરમાં ભારે ચર્ચા જગાવી છે. ઉલ્લેખનીય છે કે મેટ્રો સિટી અમદાવાદમાં મોટી સંખ્યામાં ગર્લ્સ અને બોયસ પીજી આવેલા છે, જે અન્ય જિલ્લા કે રાજ્યમાંથી આવી નોકરી કે અભ્યાસ કરતાં યુવક-યુવતીને રહેવા અને જમવાની સુવિધા આપે છે, પરંતુ દારૂ પીને ધમાલ કરતી ઘટનાને કારણે વાલીઓમાં પોતાના બાળકોની સુરક્ષા પર અનેક સવાલો ઉઠ્યા છે.
