Mysamachar.in-સુરત:
સુરત ક્રાઈમ બ્રાંચે રાજકોટના એક આશ્રમમાં ત્રાટકીને એક એવા ભગવાધારીને ઉઠાવી લીધો છે જે મૂળ કાલાવડ તાલુકાનો વતની છે અને સુરત ખાતે હેડક્વાર્ટર રાખી ભૂતકાળમાં અનેક લોકોને સ્કીમ દ્વારા ઠગી ચૂક્યો છે. આ શખ્સ હાલ ઋષિકેશના એક આશ્રમમાં રહેતો હતો અને રાજકોટ આવ્યો ત્યારે ઝડપાઈ ગયો.
સુરત શહેર ક્રાઈમ બ્રાંચે આ શખ્સને રાજકોટ જિલ્લાના લોધીકા તાલુકાના નગરપીપળીયા ગામ પાસે આવેલા જોગમઢી આશ્રમમાંથી ઝડપી લીધો છે. જામનગર જિલ્લાના કાલાવડ તાલુકાના નિકાવાના આ શખ્સનું ખરૂં નામ કાંતિલાલ રણછોડ તાળા છે અને છેલ્લા કેટલાંક સમયથી તે ‘કિશનગીરી મહારાજ’ નામ ધારણ કરી, સાધુના વેશમાં ઉત્તરાખંડના ઋષિકેશ વિસ્તારમાં મુનિ કી રેતી નામના નાનકડા વિસ્તારમાં આવેલા સ્વામી નારાયણ આશ્રમ ખાતે રહે છે. તેણે પાછલાં 7 વર્ષથી પોતાના પરિવાર સાથે સંપર્ક રાખ્યો ન હતો એવું જાહેર કરવામાં આવ્યું છે પરંતુ હાલમાં આ શખ્સના પિતા કેન્સરને કારણે પરેશાન છે એ માહિતી આ શખ્સને પહોંચી ગઈ !
આથી પોતાના પિતાની તબિયતના ખબર અંતર પૂછવા તે ગુજરાત આવ્યો અને રાજકોટ પહોંચ્યો પણ ઝડપાઈ ગયો. આ શખ્સે 2015ની સાલમાં ભાગીદાર ભરત જરીવાલા સાથે સુરતમાં કતારગામ વિસ્તારમાં લલિતા ચોકડી પાસે જમનાબા કોમ્પ્લેક્સમાં ‘ઓફિસ’ શરૂ કરી હતી. સુરત તથા સૌરાષ્ટ્રના લોકોને ટાર્ગેટ કરી છેતરપિંડીઓ શરૂ કરી હતી.
સુરતમાં આ શખ્સની ઓફિસનું નામ કે. પટેલ એન્ડ એસોસિએટ્સ તથા કે. પટેલ માઈક્રો ફાઈનાન્સ કંપની હતું. આ શખ્સ જામનગર અને સલાયા ઉપરાંત જૂનાગઢ સહિતના સૌરાષ્ટ્ર તથા ગુજરાતના વિવિધ શહેરોમાં પોતાની કંપનીની બ્રાંચ પણ ચલાવતો. લોકોને ઈનામી ડ્રો, લક્કી ડ્રો જેવી સ્કીમ આપતો. ઈનામોમાં બાઈક વગેરે ચીજો આપતો. આ શખ્સે કુલ રૂ. 84 લાખની છેતરપિંડીઓ કરી હોવાનું હાલ બહાર આવ્યું છે.
આ શખ્સ સૌરાષ્ટ્ર ગુજરાતમાં આશરે 500થી વધુ મેમ્બર ધરાવતો. અને આ મેમ્બર્સ માટે તે સ્કીમ ચલાવતો. 2018માં રૂ. 84 લાખનું ફુલેકું ફેરવી તે અદ્રશ્ય થઈ ગયો અને પ્રથમ વખત તેની સામેનો ગુનો સુરતના કતારગામ પોલીસ સ્ટેશનમાં દાખલ થયો. એ પહેલાં તો જો કે તે ફરાર થઈ ગયો હતો અને સાત વર્ષ બાદ પકડાયો ત્યારે તે કાંતિલાલ નહીં પણ કિશનગીરી મહારાજ હતો. જેની કરમકુંડળી છેક દસ વર્ષ બાદ હવે બહાર આવી.
