Mysamachar.in-
રિઝર્વ બેંક ઓફ ઈન્ડિયાએ સતત 6 મહિના સુધી મહેનત કરી, ડિજિટલ બેંકિંગ અંગેના હજારો પરિપત્ર કચરાટોપલીમાં નાંખી દીધાં અને પોલિસીમાં આવશ્યક ફેરફારો કરી 7 મુખ્ય, નવા અને આખરી નિર્દેશ ગત્ રોજ શુક્રવારે જાહેર કર્યા, જેનો અમલ આગામી કેલેન્ડર વર્ષથી શરૂ થઈ જશે.
રિઝર્વ બેંક ઓફ ઈન્ડિયાએ જાહેર કર્યું કે, ડિજિટલ નાણાંકીય વ્યવહાર તેજીથી વધી રહ્યા હોય તેની સાથેસાથે છેતરપિંડીઓ પણ વધી રહી છે. આથી આ વ્યવહારો સરળ અને સલામત બનાવવા જરૂરી બની ગયું, આથી 7 નવા માસ્ટર ડાયરેકશન જાહેર કરવામાં આવે છે, જે 1 જાન્યુઆરીથી અમલમાં લાવવાના રહેશે.
આ તમામ નવા નિર્દેશ ગ્રાહકોની સુવિધાઓ અને સરળતા તેમજ સલામતી માટે આપવામાં આવ્યા છે. આ નિર્દેશોની ઘડતર પ્રોસેસ અગાઉ રિઝર્વ બેંકે અત્યાર સુધી અમલમાં રહેલાં 5,673 સરકયુલર રદ્દ કરી દીધાં છે.
નવા નિર્દેશોને કારણે બેંક સહિતની નાણાં સંસ્થાઓ અને બેંક એકાઉન્ટ ધરાવતાં ગ્રાહકો ફાલતૂ કાગળ પ્રક્રિયાઓમાંથી મુક્તિ મેળવી શકશે એવો દાવો કરવામાં આવ્યો છે. નાના નાના ગ્રામ્ય વિસ્તારોમાં કામ કરતી સહકારી બેંકોથી માંડીને રાષ્ટ્રીયકૃત બેંકો સહિતની, ડિજિટલ બેંકિંગમાં રોકાયેલી બધી જ નાણાંકીય સંસ્થાઓને આ નિર્દેશો લાગુ પડશે. અને દરેક નાણાંકીય સંસ્થાઓએ આ માટે ડિજિટલ બેંકિંગ પોલિસી નવેસરથી તૈયાર કરવાની રહેશે.
તમામ પ્રકારનું ઈન્ટરનેટ બેંકિંગ, મોબાઈલ બેંકિંગ અને UPI વ્યવહારો સમયે લોકોના નાણાં સુરક્ષિત કેવી રીતે રહેશે, નાણાંની લિકવિડીટી કેવી રીતે મેનેજ કરવામાં આવશે અને જ્યારે કોઈ પણ ટેક્નિકલ ખામીઓ ઉભી થાય ત્યારે નાણાં સંસ્થાઓ શું કરશે ? એ બધી જ બાબતો નાણાંકીય સંસ્થાઓએ પોતાની આ પોલિસીમાં દર્શાવવાની રહેશે.
આ ફેરફારો બાદ કોઈ પણ નાણાંકીય સંસ્થા પોતાની નવી સર્વિસ ઝડપથી લોન્ચ કરી શકશે. સાયબર ક્રાઈમ સંબંધિત નિયમો વધુ કડક બની જશે. નાની અને ગ્રામ્ય વિસ્તારની બેંકો પણ મોટી અને ખાનગી બેંકોની માફક નાણાંકીય વ્યવહારની ડિજિટલ સુવિધાઓ ઉપલબ્ધ કરાવી શકશે. જો કોઈ મામલામાં ફરિયાદ થશે તો તેનો ઉકેલ ઝડપથી લાવી શકાશે.
